Smart medical pharm ва Billur Medical Trade 50 мл 70 фоизлик этил спирти ҳамда «Меновазин» маҳсулотларини ноқонуний равишда ишлаб чиқармоқда. Бу ҳақда Фармацевтика тармоғини ривожлантириш агентлиги маълум қилди.
Агентлик маълумотларига кўра, айрим фуқаролар Smart medical pharm ва Billur Medical Trade компанияларига тегишли дори воситалари сифатидан норози эканлигини билдирган. Аниқланишича, улар дори воситаларини ишлаб чиқариш ҳуқуқига эга бўлган лицензиатлар реестрига киритилмаган.
Фармацевтика тармоғини ривожлантириш агентлиги дорихоналарни Ўзбекистонда рўйхатдан ўтказилмаган, сифатсиз, қалбакилаштирилган дори воситаларини ва тиббий буюмларни, шунингдек малакатда рўйхатдан ўтказилган дори воситаларининг ғайриқонуний нусхаларини сақлаш ва (ёки) реализация қилишга йўл қўймасликлари, ушбу ҳолатлар лицензия талаблари ва шартларини қўпол равишда бузилиши ҳолатлари экани ҳақида огоҳлантиради. Акс ҳолат эса лицензиянинг амал қилиши белгиланган тартибда тўхтатилишига олиб келиши мумкин.
Ушбу корхоналарнинг ноқонуний фаолияти юзасидан Бош прокуратура ҳузуридаги Иқтисодий жиноятларга қарши курашиш департаментига мурожаатнома юборилган.
