Президент Шавкат Мирзиёев бугун Тошкент метрополитенининг Сергели йўналишини бориб кўрди. Давлат раҳбари жамоатчилик вакиллари билан поездда юриб, йўловчилар учун яратилган шароитларни кўздан кечирди.
Охирги бекатда ушбу Сергели йўналишини Қўйлиқ йўналиши билан боғлаш, ерусти метросининг кейинги босқичларини қуриш бўйича тақдимот ўтказилди. Президент тегишли топшириқлар берди.
Маълумот учун, ушбу метро йўналишини лойиҳалаштириш 2017 йилда бошланган эди. Узунлиги 7 километрлик мазкур темир йўлда бешта бекат барпо этилган. Метрополитеннинг «Олмазор» бекати билан оралиқда 580 метрлик тоннел қурилиб, ерусти ва ерости йўллари боғланган. Ушбу йўналишда кунига 35 мингтагача одам қатнаши мумкин.
Ушбу йўналиш 26 декабрь соат 16:00 дан бошлаб хизмат кўрсата бошлади. «Ўзбекистон темир йўллари» матбуот хизматининг хабар беришича, айнан бугундан бошлаб 2021 йил 1 январь соат 8:00 гача ушбу йўналишнинг «Бекат-1», «Бекат-2», «Бекат-3», «Бекат-4», «Бекат-5» станцияларида ҳаракатланиш бепул бўлади. Бироқ бепул хизмат фақат янги йўналишдан транспортга чиқилганда амал қилади. Яъни агар йўловчи Чилонзор йўналишида транспортга чиққан бўлса хизмат пуллик бўлади.
Фото: Президент матбуот хизмати.
