Газ босими пасайиши натижасида «Қувасойцемент» ва «Оҳангаронцемент» томонидан цемент ишлаб чиқариш тўхтатилган. Монополияга қарши курашиш қўмитасининг хабар беришича, ҳаво ҳароратининг кескин пасайиши аҳолининг газга бўлган эҳтиёжини ошириб, натижада цемент ишлаб чиқарувчиларга етказиб бериладиган газ босимининг пасайган.

Цемент ишлаб чиқарилиши тўхтатилганидан кейин ҳар икки ишлаб чиқарувчининг цемент маҳсулоти ўтган ҳафтада фонд биржа рўйхатига олинмаган. Натижада, цемент бозорида ўртача кунлик савдо ҳажми 46 минг тоннадан 30 минг тоннагача ёки 34 фоизга камайди.

«Сотилган цемент ҳажми 141 минг 919 тоннани ташкил этган бўлиб, бу аввалги ким ошди савдосида сотилган цемент ҳажмидан 68 минг 456 тоннага камдир (32,5 фоизга кам)», — дейилади хабарномада.

Бундан ташқари, савдо ҳажмининг пасайиши нарх ошишига олиб келди. Масалан, ҳафта бошида 1 кг цемент 512 сўм бўлган бўлса, ҳафта охирида у 539,1 сўмгача (ёки 5% га) кўтарилди. Савдо иштирокчилар сони эса 1054 дан 817 нафарга, харидорлар сони 556 нафардан 373 нафаргача камайди.

«Ўзсаноатқурилишматериаллари» уюшмаси, шунингдек, «қурилиш мавсуми тугаганига» қарамай, цемент етказиб бериш ҳажмининг пасайиши ва нархларнинг кўтарилишини таъкидлади.

Aввалроқ, Ўзбекистон Энергетика вазирлиги цемент ишлаб чиқариш корхоналарига электр энергияси етказиб беришни тўхтатиш ҳақидаги хабарларни рад этган эди.