26 октябрь куни президент Шавкат Мирзиёев электр энергетикаси корхоналарини трансформация қилиш бўйича устувор вазифалар муҳокамасига бағишланган йиғилиш ўтказгани ҳақида хабар берган эдик.
Қайд этилишича, сўнгги йилларда тизимда амалга оширилган ислоҳотлар натижасида бир йил ичида $2 млрдлик тўғридан-тўғри инвестиция ҳисобига 2700 МВт қувватли 6 та янги электр станциясини қуриш бўйича лойиҳалар бошлаб юборилган.
Йиғилишда электр энергиясининг рақобатли бозорини ташкил этиш орқали таннархни тушириш масаласига алоҳида эътибор қаратилган. «Ҳудудий электр тармоқлари» АЖ раиси «Ўзбекистон 24» телеканалига берган интервьюсида давлат раҳбари 2021−2022 йилларда электр энергияни тарифини оширмасликни асосий масаласи этиб белгилаб берганини таъкидлади.
«Ҳар бир компанияга, шу жумладан, „Ҳудудий электр тармоқлари“ АЖ олдига ҳам бир қатор вазифаларни қўйдилар. Қилинадиган модернизация, реконструкция ишларини амалга оширишга тарифни кўтариш ҳисобидан эмас, балки мана шу ишлаб чиқаришда кетадиган ҳаражатларни, яъни таннархни камайтириш эвазига эришиш масаласини қўйдилар», — дея таъкидлади компания раиси Улуғбек Мустафоев.
Йиғилишда Шавкат Мирзиёев соҳа трансформациясини тезлаштириш орқали соҳани ривожлантириш лозимлигини қайд этган.
«Давлат корхоналарини трансформация қилиш бўйича биз жуда катта ўзимизга мажбурият олганмиз, халқимиз олдида. Ҳаммамиз учун бу — янгилик. Агар биз энергетика соҳасида трансформацияни тўғри қилсак, жуда катта натижаларга эришишимиз мумкин. Энг катта нарса, бу — таннархни камайтириш. Қаерга бормасак, одамлар электр энергиядан норози. Ҳозирги кўп электр станцияларининг эскириш даражаси 50 фоиздан юқори. Уч йил олдин 70 фоиз эди. Бу албатта, рақобатбардошлилик нуқтаи назаридан, ҳаражат нуқтаи назаридан мутлақо бизнинг ҳозирги режаларимизга тўғри келмайди», — деди давлат раҳбари.
Шу билан бирга, президент янги ташкил этилган тўртта мустақил компания — «Ўзбекистон миллий электр тармоқлари», «Ҳудудий электр тармоқлари», «Иссиқлик электр станциялари» ва «Ўзбекгидроэнерго» акциядорлик жамиятлари трансформацияга тайёр ёки йўқлигини аниқлаш бўйича вазифа берган. Иссиқлик станцияларида давлат хусусий шерикчиликни ривожлантириш бошлангани, бироқ ҳудудий электр станцияларда ҳали ҳам бу кечикаётгани танқид қилинган.
«Битта Сирдарёдаги ишлаб чиқарадиган электр энергияси ҳудудга етиб боргунча неча пулга тушаяпти деган савол ҳаммани қийнаши керак. 4та компанияни раҳбари олдига қўйган вазифаларни қандай бажариш бўйича аниқ фикр айтиши керак. Булар ҳафтада 50 фоиз ишини трансформация билан шуғулланса менга ҳам маъқул», — дея қайд этди президент.
Йиғилишда халқаро экспертларни жалб қилиш, малакали кадрлар резервини яратишга алоҳида эътибор қаратиш лозимлиги айтилди.
Фото: Президент матбуот хизмати.
«Бизда билим берадиган мутахассисимиз йўқ. Кафедраларимиз йўқ. Ва энг катта нарса — мана шу соҳа бўйича экспертларимиз йўқ. Шунинг учун Россиядан иложи бўлса, уларни олиб келиб, бу ерда кадрларимизни ўқитиб, мукаммал резерв яратмасак бўлмайди. Агар бу соҳа рақобатбардош бўлиб, таннарх камайтирса ҳамма соҳамизга жуда катта ижобий таъсир кўрсатади. Тарихий ишларни бошлаяпмиз. Агар мана шу энергетикани жой жойига қўйсак, кўп ишларни самарадорлиги ва маҳсулотларимизни ҳам экспортбоплиги жойига тушади», — деди Шавкат Мирзиёев.
Йиғилишда шунингдек, «Ўзбекистон миллий электр тармоқлари», «Ҳудудий электр тармоқлари», «Иссиқлик электр станциялари» ҳамда «Ўзбекгидроэнерго» акциядорлик жамиятларида молиявий ҳисоботларни жаҳон стандартлари асосида тайёрлаш тизимига ўтиш кераклиги таъкидланди.
