Президент Шавкат Мирзиёев 20 июль куни коронавирус инфекцияси тарқалишининг олдини олиш ҳамда мамлакат ҳудудларидаги иқтисодий барқарорликни таъминлашга бағишланган йиғилиш ўтказди. Бу ҳақда «Ўзбекистон 24» телеканали хабар қилди.

Шавкат Мирзиёев сўнгги уч кун ичида коронавирус тарқалишининг олдини олиш ва касалларни даволаш бўйича катта ишлар қилинганига қарамасдан, инфекция юқтираётганлар ва вафот этаётганлар сони ортаётганини таъкидлади.

«80 фоиз ўлганлар Тошкент шаҳрига тўғри келаябди. Ҳозир иложи борича энг оғир ётганларга мутахассисларни қўйиб, уларни иложи борича тезлаштириб уларни даволаш керак. Энг катта нарса аломатларсиз беморларни уйда даволаш бўйича ўзимизга яраша янги тизим яратишимиз керак. Бу янги тизим янгилик биз учун. Ёзиб бериш керак: қандай даволанади, нима қилади? Мутахассис ўн марта телефон қилсин. Қанча тез касалликларнинг олдини олсак, зарарланганлар камроқ бўлади», — деди у.

Шавкат Мирзиёев маҳаллий поликлиника шифокорлари билан уйда даволанаётган аломатларсиз ёки коронавируснинг енгил шакли кузатилаётган беморлар ўртасида мулоқотни йўлга қўйиш зарурлигини таъкидлади.

«У уйда ўзи қолмаслиги керак. Иккинчидан, қўрқув бор. Бунинг ҳам олдини олиш учун одамлар у билан мулоқот қилиб туриш керак. Мулоқот деганда, ўша туманнинг поликлиникасидан, телефони борку ҳамманинг, бўлмаса телефонни бериб мулоқот қилдириш керак. Чиқиш ман этилади. Олиб келиб берамиз ҳамма нарсани. Мана шуни ташкил этиш керак. Агар у кўчага чиқса, зарарланиш эҳтимоли 200 фоиз бошқа одамларнинг», — деди президент.

Давлат раҳбари ҳозирги вазиятда туманнинг тўртта сектори раҳбарга кўп нарса боғлиқ эканини қўшимча қилиб ўтди.