Қаршининг «Насаф» футбол клуби ўз логотипини алмаштирди. Қанотлари билан тўпни қучаётган ҳумо қушининг ўрнига, гербга олов пуркаётган аждаҳо қайтарилди, дея хабар берди «Қашкадарё» газетаси.
Футболчилар янги рамзни ўтган ҳафта бўлиб ўтган Суперлиганинг тўққизинчи турида «Қўқон-1912» жамоаси билан бўлиб ўтган ўйинда намойиш этишди. Ўйин дуранг натижа билан (2:2) якунланди. Қаршиликлар майдонга янги либосда кириб боришди, унда олов пуркаётган аждаҳо асосий тимсол сифатида тасвирланган.
Аждаҳо тасвирланган логотипни қайтаришни жамоа 2020 йилнинг бошидан бери режалаштираётган эди. Айнан ўша даврда янги логотипнинг дизайни ишлаб чиқилган, бироқ пандемия сабабли логотип эълон килинишини бироз кечиктиришга тўғри келди.
Жамоанинг биринчи логотипи 1997 йилда тақдим этилган ва 2003, 2008, 2009, 2011, 2012 йилларда ўзгартирилган.
«Ҳар бир футбол жамоасининг ўзига хос „тахаллуслари“ мавжуд. Масалан, „Шўртан“ футбол клубининг футболчилари — бўрилар, бизникилар эса аждаҳолар. Сўнгги йилларда мухлислар „аждаҳолар“ майдонга ўзларининг қуш тасвирланган эмблемалар билан кириб боришлари нотўғри эканлигини кўп бора таъкидлашди. Шу сабабли, бу йил клуб раҳбарияти аждаҳони жамоага қайтаришга қарор қилди», — деди клубнинг спорт директори Юнус Набиев.
Шунингдек унинг таъкидлашича, 2009−2011 йилларда жамоа логотипи ва экипировкаларида аждаҳо тасвирланган эди. Унинг айтишича, ҳаммаси Қарши шаҳрининг 2700-йиллигининг нишонланиши билан бошланган. Ўшанда жамоатчиликка аждаҳо тасвирланган ноёб буюмлар совға қилишган. Ушбу археологик буюмлар мухлисларни илҳомлантирган ва «Насаф» футболчиларини аждаҳолар дея атай бошлашган.
Жамоа, шунингдек, 2020 йилги мавсумга аталган Adidas компанияси томонидан ишлаб чиқарилган янги спорт формасини тақдим этди.
