Туркия президенти Ражаб Тоййип Эрдўғон Истанбулдаги Авлиё София ибодатхонасига қайтаттан масжид мақомини бериш тўғрисидаги фармонга имзо чекди. Бу ҳақда мамлакат раҳбарининг матбуот хизмати хабар берди.
Унга кўра, Туркия Давлат кенгаши ҳукуматнинг 1934 йилда қабул қилган қарорини — Авлиё София масжидини музейга айлантириш тўғрисида — бекор қилиб, ибодатхона қайтаттан масжид сифатида ишлатилиб, унинг устидан бошқариш вазифаларини Туркиянинг Дин ишлари бошқармасига топширди.
«Авлиё Софиянинг эшиклари, бизнинг барча масжидларимиз каби, чет элликми ёки маҳаллийми, мусулмонми ёки ғайридинми, ҳамма учун очиқ бўлади. Ўзининг янги мақоми билан инсониятнинг умумий мероси бўлган Авлиё София барчани янада самимий ва ўзига хос тарзда қабул қилишни давом эттиради», — дея таъкидлади Туркия президенти Авлиё София масжидининг ибодат учун қайта очилиши бўйича халққа мурожаатида.
Туркиянинг Anadolu ахборот агентлигининг маълум қилинишича, Туркия Давлат кенгаши ушбу ибодатхона-музей Султон Меҳмет Хон жамғармаси балансида бўлганини, фонд ҳужжатлари уни масжид сифатида кўрсатганини ва ундан «бошқа ҳар қандай мақсадларда фойдаланиш қонунга ҳилоф», дея баҳолаган.
Масжид ўз фаолиятини 24 июль кунидан бошлайди.
Маълумот учун, Истанбулдаги Авлиё София ибодатхонаси — Римдаги Авлиё Пётр Базиликаси қурилишидан олдин энг катта насроний ибодатхона бўлган ва Византия меъморчилигининг машҳур ёдгорлиги ҳисобланади. 1453 йилда Византия империяси Султон Меҳмет II томонидан фатх этилгандан кейин у масжидга айлантирилган. Деярли беш аср давомида ибодатхона масжид бўлиб келган. 1934 йилда эса Туркиянинг биринчи президенти Мустафо Камол Отатурк Авлиё София масжидини музейга айлантиришни буюрган. 1985 йилда музей биноси ЮНEСКОнинг Жаҳон мероси рўйхатига киритилган.
