UzAuto Motors компанияси нархларни қайта кўриб чиқиш қарори нархлар конъюнктураси, шунингдек, ички ва ташқи бозордаги умумий макроиқтисодий вазиятнинг ўзгариши билан боғлиқ эканлигини маълум қилди. Шунингдек, компания билан тузилган шартномага мувофиқ, харидорларга етказиб берилмаган автомобиллар учун нарх ўзгармайди.
Компания ахборот хизмати тарқатган баёнотга кўра, 2017 йилнинг сентябрь ойида сўнги марта автомобиль нархлари ўзгарганидан буён долларнинг сўмга нисбатан айрибошлаш курси ўсди, хом ашё нархлари, коммунал хизматлар тарифлари, транспорт хизматлари нархлари ошди.
«Бундан ташқари, аввал солиқ имтиёзларига эга бўлган UzAuto Motors компанияси 2019 йилнинг октябрь ойидан бошлаб Ўзбекистон Республикасининг амалдаги қонунчилигига мувофиқ солиқларни умумий асосларда, жумладан ҚҚС бўйича тўлашни бошлади. 2019 йилда компания 2,5 триллион сўм солиқ тўлаган бўлса, жорий йил учун эса ушбу кўрсаткич 4,2 триллион сўмни ташкил қилиши кутилмоқда», — дейилади муносабатда.
Шунга қарамай, яқин келажакда компаниянинг ўзи учун белгилаган устувор йўналишлардан бири — автокредит ва муддатли тўлов тизимларини янада ривожлантириш сифатида кўрилмоқда.
Маълумот учун: 2019 йил давомида кредит дастурлари, муддатли тўлов ва бошқа махсус таклифлар натижасида истеъмолчиларга 52 мингдан ортиқ машина сотилди.
Қайд этилишича, соғлом рақобатбардош экотизимни яратиш мақсадида «Ўзавтосаноат» яқин келажакда масъул давлат органлари томонидан кўриб чиқиладиган Ўзбекистон бозорига олиб кириладиган хорижий автомобилларга божхона тўловларини камайтириш ташаббуси билан чиқди. Ички бозорда рақобатнинг кучайиши UzAuto Motors компаниясининг бошқарув тизимини янада такомиллаштиришга, компаниянинг рақобатбардошлигини, шунингдек ишлаб чиқарилаётган автомобилларнинг сифати ва ҳаммабоплигини оширишга имкон беради.
