Энергетика вазирлиги ҳузуридаги «Ўзбекенерго» АЖ базасида ташкил этилган учта акциядорлик жамиятига раислар тайинланди, дея хабар қилди вазирлик матбуот хизмати.
2017 йилдан «Ўзбекэнерго» компаниясини бошқариб келаётган Мустафоев Улуғбек Мавлонович «Ҳудудий электр тармоқлари"акциядорлик жамияти бошқаруви раиси этиб тайинланди.
Аввал «Ўзбекэнерго» раисининг биринчи ўринбосари ва «Тошкент ҳудудий электр тармоқлари» корхонаси бош директори лавозимида фаолият кўрсатган Исоқулов Дадажон Айнақулович «Ўзбекистон миллий электр тармоқлари» акциядорлик жамияти бошқаруви раиси бўлди.
Мубаракшин Руслан Газизович «Иссиқлик электр станциялари» акциядорлик жамияти бошқарув раиси этиб тайинланди. Аввал у «Ўзбекэнерго» раисининг биринчи ўринбосари эди.
Шунингдек, Нодир Тоҳирович Агзамов Энергетика вазирлиги ҳузуридаги Нефть маҳсулотлари ва газни назорат қилиш инспекцияси бошлиғи этиб тайинланди. У 2012−2017 йилларда Вазирлар Маҳкамасининг Геология, ёқилғи-энергетика мажмуи, кимё, нефть-кимё ва металлургия саноати ахборот-таҳлил департаментининг ёқилғи-энергетика комплексини ривожлантириш бўйича етакчи мутахассиси вазифасида ишлаган.
Асқар Шарифжонович Исаков нефть маҳсулотлари ва газдан фойдаланишни назорат қилиш инспекцияси бошлиғининг ўринбосари этиб тайинланди. Асқар Исаков илгари Вазирлар Маҳкамаси ҳузуридаги Газ ва нефть маҳсулотлари назорати давлат инспекциясининг Тошкент ҳудудий бошқармаси бошлиғи лавозимида ишлаган.
Вазирлар Маҳкамаси ҳузуридаги Электр энергетикаси соҳасида назорат бўйича давлат инспекцияси («Ўздавэнергоназорат») бошлиғи ўринбосари лавозимида фаолият кўрсатган Умаржон Усмоналиевич Эгамбердиев Энергетика назорати инспекцияси бошлиғининг ўринбосари этиб тайинланди.
Эслатиб ўтамиз, «Ўзбекэнерго» компанияси президент Шавкат Мирзиёевнинг март охиридаги қарори асисда қайта ташкил этилди.
