2017 йил ноябрида ташқи савдо вазири лавозимида фаолият кўрсатиб келаётган Жамшид Абдуҳакимович Ходжаев Қишлоқ хўжалиги вазирлигига раҳбар этиб тайинланди. Бу ҳақда ТСВ ва Қишлоқ хўжалиги вазирлигидан «Газета.uz"га хабар қилинди.
Қишлоқ хўжалиги вазири лавозимида фаолият юритиб келаётган Баҳодир Турсунович Юсупов эса Наманган вилояти Косонсой тумани ҳокими этиб тайинланди. Туман ҳокимлиги вакили «Газета.uz"га мазкур хабарни тасдиқлади.
Жамшид Ходжаев (1979 йилда туғилган) Тошкент давлат иқтисодиёт университети (2000) ва Буюк Британиянинг Бирмингем университетини (2003) тамомлаган. 2000 йилдан банк соҳасида фаолият кўрсатган, жумладан 14 йил Ўзбекистон Марказий банки тузилмаларида фаолият кўрсатиб, 8 йил раҳбарлик лавозимларида ишлаган.
2017 йилда Ўзбекистон Ташқи иқтисодий фаолият миллий банки раисининг биринчи ўринбосари, 2017 йил августида Ҳисоб палатаси раисининг биринчи ўринбосари — Давлат бюджетига тушумларнинг тўлиқ тушиши устидан назорат қилиш инспекцияси бошлиғи лавозимига тайинланган.
Фото: Халқаро пресс-клуб.
Баҳодир Юсупов 2018 йил февралида қишлоқ хўжалиги вазири этиб тайинланган эди. Унгача Ўзбекистон Фермерлар кенгашига раҳбарлик қилган, 2009−2015 йилларда Наманган вилояти ҳокими бўлиб ишлаган.
Аввалроқ президент топшириғи билан «ихчам» Вазирлар Маҳкамасини шакллантириш жараёни бошлангани ҳақида хабар қилган эдик.
