24 апрель куни юз минглаб одамлар Аргентина пойтахти Буэнос-Айрес кўчаларига чиқиб, давлат университетларига кўпроқ маблағ ажратишни талаб қилди, деб хабар бермоқда BBC.
Аргентина президенти Хавьер Милей давлат университетлари учун харажатларни камайтириш ташаббуси билан чиққанди. Ушбу чорани оқлаш учун у университетларни «социалистик идеологиялар тарғиботи марказлари» деб атади. Бюджет тақчиллигини нолга тенглаштириш мақсадида Милей вазирликларни ёпмоқда, маданият марказларини молиялаштиришни тўхтатмоқда, давлат хизматчиларини ишдан бўшатиб, субсидияларни қисқартирмоқда.
Pagina 12 газетаси ташкилотчиларнинг ҳисоб-китобларига таяниб, Буэнос-Айресдаги норозилик акцияларида 800 минг намойишчи тўпланганини ва Аргентина бўйлаб жами 1 миллиондан ортиқ киши намойишга чиққанини ёзди.
https://twitter.com/BAHeraldcom/status/1782897676083671083?ref_src=twsrc%5Etfw%7Ctwcamp%5Etweetembed%7Ctwterm%5E1782897676083671083%7Ctwgr%5E63b31c2fdac14df140efa62671529c1db10dceb7%7Ctwcon%5Es1_&ref_url=https%3A%2F%2Fwww.gazeta.uz%2Fru%2F2024%2F04%2F24%2Fargentina%2F
BBC`нинг таъкидлашича, намойиш кўлами, эҳтимол, Майли ўтган декабрь ойида ҳокимият тепасига келганидан бери Буэнос-Айресни ларзага келтирган бошқа оммавий норозиликлардан ҳам ошиб кетди.
Талабалар ва ўқитувчилар мамлакатдаги таъсирга эга касаба уюшмалари ва сўл сиёсий партиялар билан норозилик намойишини ташкил этишни мувофиқлаштирди. Намойишчилар қўлларида дарсликлар, дипломлар олиб, давлат мадҳиясини куйлади. Маршга ҳатто консерватив сиёсатчилар, хусусий университет маъмурлари ва ўнг қанот телебошловчилар ҳам қўшилди, дея аниқлик киритади AP.
«Биз ҳукуматга улар бизнинг таълим олиш ҳуқуқимизни тортиб ололмаслигини кўрсатишга ҳаракат қилмоқдамиз, — деди агентликка 32 ёшли талаба Сантьяго Cираоло. Бу ерда ҳамма нарса хавф остида».
Ҳукумат Аргентинанинг энг йирик университети бўлган Буэнос-Айрес университетига 2023 йил июль ойидан бери жами бюджетнинг атиги 8,9 фоизини ажратди, дея қайд этди AP. Университетнинг таъкидлашича, бу миқдор ўқув шифохоналарини электр энергияси ва асосий хизматлар билан таъминлашга базўр етади.
Ўтган ҳафта университет расмийлари қутқарув режаси бўлмаса, муассаса яқин ойларда ёпилиши ҳақида огоҳлантирди. Натижада 380 минг талаба қийин аҳволга тушиб қолади. Бу бепул ва юқори сифатли университет таълимини энг асосий ҳуқуқлардан бири деб биладиган аргентиналиклар учун шок, деб таъкидлайди AP.
Февраль ойида Аргентинада Милейнинг радикал ислоҳотларига қарши оммавий митинглар бўлиб ўтганди. Танқидчилар бу мамлакат демократиясига путур етказишини айтган, президент эса иқтисодий инқироздан чиқиш учун «шок терапияси» зарурлигини таъкидлаганди.
