Жанубий Кореяда мухолифатчи Корея демократик партияси парламент сайловларида ҳукмрон Халқ кучи партиясидан сезиларли ўзиб кетди, деб ёзмоқда The Korea Times.
Барча овозларни санаб чиқиш натижаларига кўра, демократик партия Миллий ассамблеядаги (парламент) 300 та ўриндан 175 тасини қўлга киритди. Мухолифатчи партиялар умумий ҳисобда 190 дан ортиқ ўринни эгаллади. Бу Корея демократик партиясининг 2016 йилдан бери парламент сайловларида кетма-кет учинчи ғалабаси бўлди.
Халқ кучи партияси жами 108 та ўринни олди. Натижалар эълон қилингандан сўнг партия раҳбари Хан Донг Хун ўз лавозимидан кетишини эълон қилди. Бош вазир Хан Док Су ҳам мағлубият туфайли истеъфога чиқишни таклиф қилган.
10 апрель куни бўлиб ўтган сайловларда 29 миллиондан ортиқ жанубий кореялик иштирок этди. Сайловчилар иштироки 67 фоизга етди — бу мамлакатдаги 32 йил ичидаги энг юқори кўрсаткич.
BBC нашрининг ёзишича, бу сайловлар кўплаб экспертлар томонидан беш йиллик ваколати уч йилдан кейин тугайдиган президент Юн Сок Ёлга ишонч билдириш бўйича оралиқ референдум сифатида баҳоланади. Унинг легитимлиги 2022 йилда сайланганидан бери яшаш нархининг ошиши ва қатор сиёсий жанжаллар туфайли тушиб кетди.
Сайловга бир неча ҳафта қолганда президент «инфляциянинг сайловчиларга таъсирини тан олмагани» учун қаттиқ танқид қилинди, деб ёзади BBC. Март ойида Юн Сеул бозорига ташриф буюрди ва кўк пиёзнинг мақбул нархларда сотилиши билан мақтанди. Бироқ субсидиялар туфайли маҳсулот нархи арзонлашганди. Юннинг баёноти жамиятда салбий муносабатга сабаб бўлди ва кейинчалик фермерларнинг норозиликларига ҳам учради ҳамда Корея демократик партияси сайлов митингларига кўк пиёз боғлари олиб чиқилди.
Ҳукмрон партиянинг позициясига февраль ойидан бери давом этаётган стажёр шифокорларнинг иш ташлаши ҳам таъсир кўрсатди. 8500 дан ортиқ кичик шифокорлар ҳукуматнинг тиббиёт олий ўқув юртларига қабул квоталари ошириш режасига қарши норозилик сифатида истеъфога чиқиш тўғрисида ариза ёзган.
Халқ кучи партияси ва Юннинг рейтинглари президент рафиқаси Ким Конг Хи билан боғлиқ жанжалдан кейин тушиб кетди. Хоним 2200 доллардан ортиқ турувчи Dior сумкасини руҳонийдан совға сифатида қабул қилган. Руҳоний 2022 йил сентябрида бўлган бу ҳодисани ўз соатига яширилган махфий камера билан ёзиб олган. Кейин бу ёзув интернетда пайдо бўлди ва мамлакат раҳбари, биринчи хоним ва партиянинг юқори мартабали аъзоларига нисбатан коррупция айбловларини келтириб чиқарди.
