Shavkat Mirziyoyev seshanba kuni Oksana Chusovitina nomidagi gimnastika bo‘yicha sport mahorati maktabiga tashrif buyurdi, deb xabar qildi davlat rahbari matbuot xizmati.
Oksana Chusovitina badiiy gimnastika bo‘yicha uch karra jahon chempioni, Jahon kubogi g‘olibi, sakkizta Olimpiya o‘yinlarida qatnashgan yagona gimnastikachi sifatida Ginnesning rekordlar kitobiga kiritilgan. Prezidentning 2022-yil 14-martdagi qaroriga asosan uning nomidagi davlat sport maktabi ochilgan.
Maktab yuqori malakali mutaxassislarni jalb qilgan holda terma jamoalar uchun xalqaro toifadagi sportchilarni tayyorlash, shuningdek, murabbiy va gimnastikachilarning malakasini oshirishga qaratilgan.
Ta’lim muassasasi 1−11-sinflardagi 105 nafar o‘quvchiga mo‘ljallangan. Bugun bu yerda 91 nafar bola tahsil olmoqda. Yosh gimnastikachilar qo‘shni 175-maktabda umumiy ta’lim darslarida qatnashadi. Ularga ikkita chet tili o‘rgatiladi.
Uch qavatli binoning birinchi qavatida asosiy zal va mashg‘ulot zali, sport zali, tibbiyot kabineti va ovqat xonasi joylashgan. Yuqori qavatlardan 165 o‘rinli yotoqxona, mehmonxona, informatika va ma’naviyat to‘garaklari xonalari o‘rin olgan. Maktab Germaniyadan keltirilgan jihozlar bilan jihozlangan. Bu mamlakatdagi gimnastikachilarni tayyorlash uchun yagona bazaga aylanadi.
“Nima uchun biz bu yo‘nalishga katta e’tibor berib, maktablar yaratyapmiz? Gimnastika — hamma sport turlarining asosi. Futbolchi ham, bokschi ham, sog‘lom bo‘laman degan inson ham gimnastika qilishi kerak. Iqtisodiyotni rivojlantirish, yoshlarga ta’lim berish bilan birga, ularni sport bilan shug‘ullantirolsak, yurtimizda sog‘lom zurriyod, sog‘lom millat bo‘ladi”, — dedi prezident.
Shu yerda sport sohasi mutasaddilari hamda videoaloqa orqali hududlar rahbarlari ishtirokida muloqot bo‘ldi. Gimnastikani bolalar bog‘chalaridan keng joriy qilish, qobiliyatli sportchilarni saralashni shu bosqichdan boshlash, har bir hududda ikkitadan gimnastika maktabi tashkil etish masalalari muhokama qilindi.
Shu kuni Shavkat Mirziyoyev 2022-yildagi farmoni asosida ochilgan Olimpiada chempioni Bahodir Jalolov boks maktabiga tashrif buyurdi. Birinchi qabul 2022-yilda bo‘lib o‘tgan va hozir bu yerda 50 nafar talaba tahsil olmoqda. Maktab 175 o‘ringa mo‘ljallangan bo‘lib, har yili 5−11-sinflar uchun 25 nafar o‘quvchi tanlab olinadi.
