14 апрель куни Тошкент шаҳрининг Янгиҳаёт туманида фуқаро профилактика инспекторини пичоқлаб, тан жароҳати етказди. Бош прокуратура матбуот котиби Хаёт Шамсутдинов ҳолат бўйича тармоқларда тарқалган хабарларга муносабат билдирди.
Аниқланишича, тумандаги ИИБ ХПБ профилактика инспекторлари бир хонадонда жанжал бўлаётганлиги ҳақидаги хабарга аниқлик киритиш мақсадида етиб келган.
Шу пайт хонадон эгаси маст ҳолда хизмат вазифасини бажараётган ички ишлар ходимларига қаршилик кўрсатиб, профилактика инспекторларининг бирининг кўкрак қафасига ошхона пичоғи билан бир маротаба уриб, тан жароҳати етказган. Тан жароҳати олган профилактика инспектори шифохонага олиб борилган ва унга тиббий ёрдам кўрсатилган.
Ҳолат юзасидан Жиноят кодексининг 105 (Қасддан баданга ўртача оғир шикаст етказиш) ва 219 (Ҳокимият вакилига ёки фуқаровий бурчини бажараётган шахсга қаршилик кўрсатиш) моддалари билан жиноят иши қўзғатилган. Тергов ҳаракатлари олиб борилмоқда.
