29 март тонгида АҚШнинг Мичиган штати, Детройт шаҳрида профессионал бокс оқшоми ташкил этилди. DAZN ҳамда Salita Promotions ҳамкорлигида ўтказилган ушбу оқшомнинг иккинчи асосий жангида суперенгил вазн тоифасида IBA камари учун собиқ даъвогар Шоҳжаҳон Эргашев панамалик Хуан Хуертасга қарши рингга чиқиб, уни мағлуб этди.
Ўзбекистонлик боксчи 10 раундга мўлжалланган жангнинг 1-раундидаёқ рақибини нокаутга учратди ва фаолиятидаги навбатдаги ғалабасини қўлга киритди.
Жангдан сўнг Эргашев интервью бериб, ўзи мағлубиятга учраган жангни эслади ва реванш сўради.
«Бу жангдан сўнг, Сабриель Матиас билан реванж жангини ўтказмоқчиман. Бутун дунё буни билиши керак, мен ўша жангда ютқазганимнинг сабаби бор. Уни танлашда шубҳа қилмагандим, соғлиғимдаги муаммо сабаб бўлганди бунга. Ҳозир ўзимни жуда яхши ҳис қиляпман. Бутун дунё бу жангни кўрди: 3 раунд яхши жанг қилдим. Менга яна ТОП-10 таликда турувчи бирор спортчини беринг, бундан кейин Матиасни беринг. Менга у керак», — деди Шоҳжаҳон Эргашев.
Маълумот учун, Эргашев IBA камари учун жангда Сабриэль Матиасга имкониятни бой берганди. У Шоҳжаҳон Эргашевни техник нокаутга учратганди.
