Марказий банк Банк назорати қўмитасининг 2023 йил декабрь ойидаги 9 та йиғилишида 46 та масала кўриб чиқилиб, 3 та банкнинг айрим операцияларни амалга ошириши чекланди, 2 та банкка эса жарима санкцияси қўлланди, дея хабар берди регулятор матбуот хизмати.
Рўйхатга олиш ва рухсат бериш йўналишида 22 та масала кўриб чиқилиб, улардан кредит ташкилотлари уставига киритилган ўзгартиришларни рўйхатдан ўтказиш (11 та), кредит ташкилотларининг устав фондидаги улушига эгалик қилиш учун рухсат бериш (3 та) ҳамда тижорат банклари кузатув кенгаши ва бошқаруви аъзолари, шунингдек, муҳим аҳамиятга эга ходимларининг номзодларини кўриб чиқиш (8 та) каби масалалар ўрин олган.
Кредит ташкилотларининг молиявий ҳолати бўйича (24 та масала) банклар ва тўлов ташкилотлари томонидан Марказий банкнинг пруденциал меъёрлари талабларининг бажарилиши, банклар ва микромолия ташкилотларида ўтказилган ўрганишлар натижалари муҳокама қилинган.
«Хусусан, амалдаги қонунчилик талабларига риоя этилмагани оқибатида 3 та банкка нисбатан айрим операцияларнинг амалга оширилишига чеклов ўрнатилди ва 2 та банкка жарима санкцияси қўлланди. Шунингдек, Марказий банкнинг меъёрий-ҳуқуқий ҳужжатлари талабларига риоя қилиниши таъминланмагани учун 1 та ломбардга чора ва санкциялар қўлланиши тўғрисида огоҳлантирилди», — дейилади хабарда.
Шу билан бирга, Корея Республикаси «Кёнгнам банк» акциядорлик жамияти Бошқарув қўмитасининг қарорига мувофиқ, ушбу банкнинг Ўзбекистондаги ваколатхонаси фаолияти тугатилгани сабабли унга берилган аккредитация сертификати бекор қилинган ҳамда LOMBARD MAGIC CROWN МЧЖ ломбардда ўтказилган текшируви натижаси аниқланган қўпол қоидабузарликлари учун ломбардлар реестридан чиқарилган.
Бундан ташқари, қўмита томонидан ўзининг тизим барқарорлигини сақлаш, омонатчилар ва инвесторлар ҳуқуқларини ҳимоя қилиш принципидан келиб чиқиб, тижорат банклари бошқарувлари зиммасига аниқланган камчиликларни тузатиш, ўрнатилган пруденциал нормативларга амал қилиш, банк фаолиятида мавжуд заифликларни бартараф этиш ва молиявий ҳолатини соғломлаштиришга қаратилган талабларга риоя қилиш юзасидан тегишли кўрсатмалар берилган.
