13 декабр куни Қонунчилик палатасининг Ҳукумат соатида қуйи палата спикери ўринбосари Алишер Қодиров йўллардаги тирбандликларни камайтириш ва жамоат транспортини оммавийлаштириш учун хусусий транспортлар мақомини белгилаш кераклиги ҳақида гапирди.
«Бугун биз жамоат транспорти муаммосини ҳал қилиш борасида жуда кўп бош қотиряпмиз ва катта ишлар қилиняпти. Биз жамоат транспорти учун қанча ҳаракат қилишимиздан қатъий назар, хусусий транспорт масаласидаги мақомни ҳал қила олмасак, кўзлаган мақсадимизга етолмаймиз. Хусусий транспортлар Ўзбекистонда сўнгги 10 йил ичида беш баробар кўпайганини ҳисобга оладиган бўлсак, бу катта таҳдидга айланишни бошлайди», — деди Қодиров.
«Биз ҳали Жаҳон савдо ташкилоти протоколига уйғунлашишни бошлаганимиз йўқ. Эртага ташкилотга киргандан кейин машиналар[ни сотиб олиш] яна ҳам имкониятли бўлади ва Ўзбекистонда бугунги тирбандлик масаласи иқтисодиёт, умуман, жамоатчиликни катта бир муаммосига айланади. [Бу] ҳозир ҳам муаммо», — деди спикер ўринбосари.
Алишер Қодиров бу борада Хитой ва Сингапурни мисол қилиб келтирди.
«Масалан, Хитойнинг тажрибасини олиб қарайдиган бўлсак, у ерда автомобиль сотиб олиш қийин эмас, чунки ЖСТнинг талаблари бор. Лекин, автомобилга хизмат кўрсатиш ва ундан фойдаланиш билан боғлиқ хизматлар жуда ҳам қиммат. «Парковка»си бўлсин, солиқлар жорий қилиш ёки пулли йўллар орқали… Сингапурда ҳам худди шундай. У ерда ҳам хусусий транспортдан фойдаланишни қиммат қилиш ҳисобига тирбандлик масаласини ҳал қилинган», — деди Қодиров.
Унинг таъкидлашича, бу масалага Транспортни ривожлантириш концепциясида эътибор қаратиш керак.
«Транспорт вазиримиз арзон, қулай ҳамда тартибли жамоат транспортини таъминлаш билан биргаликда хусусий транспорт масаласида, унинг жозибадорлиги масаласида жиддий таклифлар ишлаб чиқиш керак. Хусусий транспорт ҳамма хоҳлаган вақтида эриша оладиган масала бўлиши керак эмас. Биз бунга жамоат транспорти қулайлиги орқали эришамиз. Агар жамоат транспортини қулай қилсангиз, одамларга хусусий транспортдан фойдаланиш жозибадор бўлмай қолади», — деди Алишер Қодиров.
