Энергетика вазири Жўрабек Мирзамаҳмудов бошчилигидаги ишчи гуруҳ (ички ишлар ва прокуратура органлари ходимлари билан ҳамкорликда) томонидан ўтказилган назорат тадбирида Тошкент вилоятида жойлашган АГТКШ табиий газ ва электр энергиясидан ноқонуний фойдаланиб келаётгани аниқланди, дея хабар бермоқда вазирлик матбуот хизмати.
3 январь куни соат 21:00 лар атрофида Янгийўл туманида жойлашган «Hamkor gaz servis» МЧЖга қарашли автомобилларга газ тўлдириш компрессор шохобчаси (АГТКШ) белгиланган ўчириш графигига риоя этмаган ҳолда фаолият кўрсатаётгани маълум бўлди.
Мазкур шохобчанинг газ ҳисоблаш ускунаси кўздан кечирилганда ускунага ташқи таъсир кўрсатилгани, яъни шохобча фаолият кўрсатаётган бўлсада, ускуна ишламаётгани (кўрсаткичлари 0 ҳолатда эканлиги) аниқланди ҳамда табиий газ етказиб бериш тўхтатилиб, газ ҳисоблагич экспертизадан ўтказиш учун ечиб олинди.
Шунингдек, шохобчанинг электр таъминоти ҳолати ўрганилди. Хусусан, электр ҳисоблагич маълумотларини маълумотлар базаси билан солиштирилганда ноябрь ойидан буён алоқа мавжуд эмаслиги аниқланди ва ҳисоблагич экспертизага юборилди.
Шу билан бирга, ушбу АГТКШнинг газ ҳисоблагичи белгиланган тартибга зид равишда ўрнатилгани аниқланди.
Ҳолат бўйича вилоят прокуратураси томонидан АГТКШга ва «Ўзтрансгаз» АЖ ҳудудий бошқармаси масъулларига нисбатан жиноят иши қўзғатилди.
