Шавкат Мирзиёев 29 декабрь куни ўқитувчилар билан ўтказилган учрашувда туман ва вилоят халқ таълими бўлимларини танқид қилди, деб хабар бермоқда президент матбуот хизмати.
Давлат раҳбари ҳар бир боланинг истагидан келиб чиқиб, унинг талабига кўра таълим беришни ўрганиш кераклиги, бола ўзига нима қизиқ эканини яхши билиши, унга ҳамма фанни бирдек ўргатишни тўхтатиб, қизиқиш соҳасига урғу қаратиш лозимлигини билдирди.
««РайОНО» ва «облОНО» сиз учун прокурор. Бу икки ташкилотни йўқ қилишни истаяпман, мактабларнинг ўзи «райОНО» ва «облОНО» бўлишларинг керак. Ўртадаги бошқа поғоналар нимага керак? Улар бўлгани учун ўқитувчи қадам қўя олмайди. Буни синдирадиган вақт келди. Тартиб керак, албатта, аммо бунинг учун вазирлик бор. Бизда ҳамон эски тизим сақланиб қолмоқда. Мактаб аслида «горОНО»га хўжайинлик қилиши керак. Биз эски тизимга мойиллик қиламиз, «райОНО» нима деса, шуни қиламиз. Замон ўзгармоқда, кечирасизу, қишлоқ хўжалигида пахтага тизим ўзгартирдик. Энди пахта ҳам, тизим ҳам ишламоқда», — деди президент.
Аввалроқ президент Халқаро конгресс марказида бошланғич синфлар учун ишлаб чиқилган дарсликлар тақдимоти билан танишгач, ўқитувчилар билан суҳбатлашганди. Давлат раҳбари болаларнинг таълим жараёнида ота-оналарнинг ҳам масъулиятини ошириш кераклигини таъкидлаб, бунда ўзини шахсий мисол қилиб кўрсатганди.
