Ноябрь ойида ўтказилган сўров натижаларига кўра, респондентларининг келгуси 12 ой учун нархлар ўзгариши бўйича инфляцион кутилмалари ўтган ойга нисбатан бироз юқорилаб, 15,3 фоиз атрофида шаклланган бўлса, медиана қиймати 14,1 фоизгача тезлашди, дейилади Марказий банк тақдим этган сўров натижалари шарҳида.
Маълум бўлишича, келгуси 12 ойда инфляция кўрсаткичи жорий даражада ёки ундан юқорироқ бўлишини кутаётган респондентларнинг улуши аввалги ойга нисбатан 9 фоиз бандга юқорилаган.
Шунингдек, инфляцияни келгусида 13−16 фоиз атрофида бўлишини кутаётган респондентлар улуши сезиларли даражада ортган.
Келгуси даврда нархларга оширувчи босим кўрсатиши мумкин бўлган асосий омиллар сифатида валюта курсининг қадрсизланиши (51 фоиз), ёқилғи ва энергия ресурслари нархининг қимматлашиши (38 фоиз) таъкидланган.
Шу билан бирга, асосий озиқ-овқат маҳсулотларининг қимматлашиши таъкидлаганлар камайган бўлса, нархларнинг сунъий оширилиши кўрсатганлар улуши ойга нисбатан бироз юқорилаган.
Тадбиркорлик субъектларининг инфляцион кутилмалари жорий йилнинг ноябрь ойи якунлари бўйича келгуси 12 ой учун нархлар ўсиши ўтган ойга нисбатан бироз ошиб, 14,3 фоизни ташкил этди, медиана қиймати эса 12 фоизни атрофида шаклланди.
Келгуси 12 ойда инфляция кўрсаткичи жорий даражада ёки ундан юқорироқ бўлишини кутаётган респондентлар улуши ўтган ойга нисбатан ўзгаришсиз қолган.
Бир йилдан сўнг инфляция 13−16 фоиз доирасида бўлишини кутаётган бизнес вакилларининг улуши ортгани ҳолда, 17−20 фоиз бўлишини таъкидлаганлар камайган.
Тадбиркор респондентлар томонидан кейинги 12 ойда нархлар ошишига ёқилғи маҳсулотлари ва транспорт хизматларининг нархлари қимматлашиши (50 фоиз), шунингдек, валюта курсининг қадрсизланиши (48 фоиз) ҳамда импорт қилинадиган хомашё ва бутловчи қисмлар қимматлашиши (32 фоиз) каби омиллар таъсир этиши мумкинлигини таъкидлаганлар улуши ошган.
