2 ноябрь куни Олий Мажлис Сенатининг Senat.uz расмий сайтини ҳакерлар бузиб кирди. MY5 каналида эфирга узатилган репортажда буни 14 ёшли йигитлар қилгани айтилди. ИИВнинг Киберхавфсизлик маркази эса буни инкор этиб, киберҳужумни наманганлик фуқаро бажарганини маълум қилди.
Расмий сайтга ҳужум бўлган пайтда унинг ичига «Киберхавфсизлик марказига саломлар» ҳамда «сизнинг тизимингиз ҳакерлар жамоасининг логотипи томонидан бузиб кирилди» деган ёзув қолдирилганди.
Фото: Ижтимоий тармоқларда тарқалган расмдан скриншот
MY5 телеканалида берилган репортажга кўра, MarshGolden жамоасининг 6 нафар ўсмирлари 2018 йилдан бошлаб турли давлат ташкилотларининг расмий сайтларини бузиб келган. Жамоа бошчиси сифатида келтирилган фуқаро биринчи ҳужумини 2019 йилда kundalik.com сайтига уюштирган ва ўзининг баҳоларини тўғрилаб олган.
Фото: MY5
У пайтда [сайт] анча заиф эди. Жамоа йиғиб ҳамма билан иш қилишни бошлаганмиз. Унда баҳоларимизни тўғрилаб олганмиз. 2 ноябрь куни соат 11:00 да ҳали бери сайт заиф вақтида давлатга сайтнинг заифлигини кўрсатиш мақсадида Senat.uz сайтига киберҳужум амалга оширдик, дея таъкидлади у.
Киберхавфсизлик маркази берган маълумотларга кўра, бу ишни қилган ҳақиқий ҳакер Наманган вилоятининг Норин туманида яшовчи фуқаро бўлган. Улар буни 3 ноябрь куни аниқлаган.
«Мен Наманган вилоятининг Норин туманида туғилганман. Бу ҳужумни 2 ноябрь куни таҳминан соат 11:00 ларда бажардим. Шунчаки сайтнинг заифлигини кўрсатиб қўймоқчи эдим. 28 октабрь куни web-сайтнинг эгаларига бу ҳақида репорт [огоҳлантириш] қилинган, лекин, жавоб келмади. Шу сабаб бу ишни қилгим келди», — деди у.
Унинг сўзларига кўра, MY5 каналига интервью берган гумондорларнинг ҳамма айтган гаплари ёлғон.
«Бу интервьюдаги ҳамма айтилган гаплар ёлғон. MarshGolden`ни мен яратганман. Телеграм канал ҳам менга тегишли, унинг админи ҳам менман, деди фуқаро.
Наманганлик фуқаро бу ишларнинг ноқонуний эканини билмагани, соҳа ходимлари унинг уйига келиб, буни тушунтирганини маълум қилди. «Қилган ишимдан пушаймонман», — дея қўшимча қилди у.
Ҳозирда воқеа бўйича далилий ашёлар йиғилиб, ҳолатга ҳуқуқий баҳо бериш учун ҳуқуқни муҳофаза қилувчи органлар иш олиб бормоқда.
Сенат сайти эса 2 ноябрнинг ўзида фаолиятини қайта тиклаш чораларини кўрди.
