Тошкент шаҳар Учтепа туманидаги маҳаллада «WHITE RESIDENCE» томонидан қурилаётган кўп қаватли бино қурилиши аҳоли норозилиги сабаб вақтинча тўхтатилди. Бу ҳақда Қурилиш вазирлиги маълум қилди.
Кўкча-Оқтепа маҳалласи 6 бўлимда истиқомат қилувчи аҳолининг кўп қаватли турар-жой биноси қурилишидан норозилиги тўғрисида видеохабар тарқалди. Унда аҳоли вакилларининг айтишича, бино сабаб маҳалла инфратузилмасига ёклама ортади.
Бундан ташқари, аҳолининг қайд этишича, бир қаватли ҳовли уйлар яқинида 12 қаватли уй қуриш эстетик жиҳатдан ҳам тўғри эмас.
Вазирлик маълум қилишича, ҳолат юзасидан объект жойига чиқиб ўрганилган.
«WHITE RESIDENCE» МЧЖ раҳбарияти аҳоли билан муросага келмагунича қурилиш ишларини тўхтатиб турилиши белгиланган. Бу бўйича қурилиш компаниясидан кафолат хати олинган.
Кўп хонадонли турар-жой биноси қурилиши эскиз лойиҳаси учун 2022 йил 27 июнда Тошкент шаҳар Қурилиш бош бошқармаси Лойиҳа-смета ҳужжатларини келишиш бўйича Архитектура ва шаҳарсозлик кенгаши ишчи органининг хулосаси олинган.
Ишлаб чиқилган лойиҳа ҳужжатларига «Қурилиш лойиҳа экспертиза синов» МЧЖнинг 2020 йил 28 декабрдаги 43−1/22-сонли йиғма эксперт хулосаси берилган. Шундан сўнг 2022 йил 25 августда Тошкент шаҳар қурилиш соҳасида ҳудудий назорат инспекциясидан қурилиш-монтаж ишларини бошлаш учун объект рўйхатдан ўтказилган ва инспекция томонидан тизимли назорат ўрнатилган.
