Ал-Ақсо масжиди кутубхонаси сақловидаги Имом ал-Бухорий ва Исо ат-Термизий муаллифлигидаги нодир қўлёзмаларнинг электрон нусхаларии ҳамда кутубхонадаги қўлёзмалар каталоги Ўзбекистонга олиб келинди. АОКАда бўлиб ўтган брифингда бу ишлар «Ўзархив» агентлигининг 4−7 апрель кунлари Исроилга қилган хизмат сафари доирасида амалга оширилгани маълум қилинди.
Шунингдек, Исроил давлат архиви сақловидаги Бухоро яҳудийлари уюшмасига тегишли ҳужжатлар тўплами (1940−1960 й.) ҳамда Ўзбекистоннинг илк мустақиллик байрами муносабати билан юборилган табрикнома ва табрик учун билдирилган ташаккурнома хатлар тўплами (1992 й.) нусхалари ҳам Ўзбекистонга келтирилган.
Ҳужжатлар Ўзбекистон Миллий архиви томонидан ўрнатилган тартибда давлат сақловига қабул қилиб олинган.
Қолаверса, Венгрия миллий архиви ва «Ўзархив» агентлиги орасида ўзаро ҳужжатлар алмашинуви бўлгани ҳам маълум қилинди. Унда ўзбек ва венгер тарихий алоқаларига оид архив ҳужжатларини аниқлаш ишлари ташкил этилган.
Хусусан, Венгрия Ўзбекистонга тарихий хариталар тўпламини тақдим этди. Ўзбекистон эса Венгрия-Ўзбекистон ўртасидаги тарихий алоқалар, венгриялик саёҳатчи Арминия Вамберига оид ҳужжатларнинг («Перечень архивных документов об исторических взаимоотношениях Узбекистана и Венгрии. По личному фонду № И-1009 «Николай Петрович Остроумов». Подлинные документы венгерского путешественника Арминия Вамбери (под именим Рашид Эфенди)) француз тилида аниқланган архив ҳужжатларини Венгрия миллий архивига топширди.
Мазкур ҳужжатлар ҳамкор ташкилот томонидан таржима қилиниб, «Ўзархив» агентлигига қайта тақдим этилган.
