8 март куни Apple ўзининг iPhone SE, iPad Air, MacStudio ва бошқа янги маҳсулотларини тақдим қилди. Қайд этилишича, ушбу маҳсулотлар 2022 йил 18 март кунидан бошлаб сотувга чиқарилади.
Тақдимот бошида компания яшил iPhone 13 ва iPhone 13 Pro смартфонларини тақдим этди.
iPhone SE
Янгиланган iPhone SE A15 Bionic процессори ва 4,7 дюймлик экранга эга. Смартфон қизил, қора ва оқ рангларда чиқарилади. iPhone SE`да 5G қурилмаси ўрнатилган бўлиб, қуввати узоқ муддатга етиши қайд этилди.
Смартфоннинг ташқи кўриниши iPhone 8 га ўхшаб кетади. Янги iPhone`нинг орқа камераси бир дона.
iPhone SE нархи 429 доллардан бошланади.
iPad Air
Тақдим этилган янги iPad Air саккиз ядерлик М1 процессорига эга бўлади. Ушбу процессор илк бор Apple Mac компьютерларида ўрнатилган. iPad Air 12Мп лик олд камера ва 5G`га эга бўлиб, кўплаб қурилмалар билан ишлай олади.
Ушбу iPad сиғими 64 ва 256Гб лик, шунингдек, SIM карта ва SIM картасиз версияларга эга. Нархи 599 доллардан бошланади.
M1 UltraFusion процессори
M1 UltraFusion процессори Apple компаниясининг 2021 йил октябрь ойидаги тақдимотида энг кучли деб номлаган М1 Max процессоридан икки баравар кучлироқ. Таққослаш учун: М1 Max 57 миллиард транзиторга эга, M1 UltraFusio`да эса транзиторлар сони 114 миллиардга етади.
«Бу компьютерлар учун яратилган энг қудратли процессор», — дейилади компания тақдимотида.
Маълум қилинишича, ушбу процессор графика, видео ва IT билан шуғулланувчилар учун айни муддао.
MacStudio — компьютер
MacStudio компьютери Mac Mini`нинг «семиртирилган» варианти. Унинг учдан икки қисми совутиш тизимидан ташкил топган. Компьютер Thunderbolt 4, ethernet, 2 та USB, audio jack ва SD-карта ўқиш имкониятига эга.
MacStudio компьютери iMac 27 дан икки баравар тезроқ (M1 Ultra ўрнатилганда 4,5 баравар).
Қайд этилишича, MacStudio компаниянинг барча компьютерларидан кучлироқ бўлиб, унинг нархи 1999 доллардан бошланади. (M1 Ultra ўрнатилганда — 3999 доллар)
Apple Studio Display — монитор
Янги Apple Studio Display 5К сифатга эга бўлиб, диагонали 27 дюймни ташкил этади. Монитор, шунингдек, 12Мп камера, 6 та динамика, 3 та USB-C ва микрофонга эга. Apple Studio Display`нинг бошланғич нархи 1599 долларни ташкил этади.
