Олий Мажлис Сенати раисининг биринчи ўринбосари Содиқ Сафоев ўз интервьюсида «Нима учун минтақа давлатлари Марказий Осиё Иттифоқини яратиш масаласини кўриб чиқмайди», деган саволга жавоб берди.
«Интеграциянинг асосий таркибий қисми бу давлат ва иқтисодий тузилишнинг умумий тамойиллари, қадриятлар ва уйғун механизмлари ҳисобланади. Марказий Осиё давлатларида бу мавжуд эмас. Шунга қарамасдан, жуда катта қизиқиш бор, бироқ бу масалани кўтаришга ҳали вақтли», — деди сенатор минтақадаги интеграция жараёни истиқболлари ҳақида гапириб.
«Лекин, Ўзбекистоннинг ташқи сиёсатидаги энг асосий ютуқларидан бири — сўнгги 4 йил ичида минтақа мамлакатларининг ишончли ҳамкорлигини тиклашга муваффақ бўлгани, деб ўйлайман. 5−6 йил олдин ҳавода душманлик, шубҳа ва қандайдир агрессия ҳиди эсиб турар эди. Ҳозирда биз диалогни тиклашга эришдик. Одамлар гаплаша бошлади, улар муросага ҳам тайёр. Бугунги кунда одамлар йиллар давомида чегаралар бўйлаб тўхтаб қолган масаланинг вариантларини муҳокама қилмоқда. Бу одатда муҳокама қилиш учун „табу“ (тақиқ) бўлган», — деди Сафоев.
Сенат раисининг биринчи ўринбосари делимитация ва демаркация жараёнини якунламасдан туриб, Ўзбекистонда мустақил давлат шаклланишининг якунланиши ёки транзит даврнинг якунланиши ҳақида гапиришга эрта эканлигини ҳам айтди.
«Ушбу фундаментал саволни ҳал қилишимиз керак. Биргина сув ресурсларини бошқариш ҳаёт-мамот масаласидир. Бугунги кунга келиб, компромиссни топиш ва олдинга силжишга эришдик. Лекин, ҳаммаси ҳал этилгани йўқ, ҳали олдинда кўплаб ишлар бор. Бироқ, икки томонлама ва кўп томонлама ҳамкорлик учун барча шарт-шароитлар яратилган. Мен ўйлайманки, бу айни босқичда катта ютуқ ҳисобланади», — дея қайд этди Содиқ Сафоев.
