Туркиянинг Истанбул шаҳрида 31 ёшли ўзбекистонлик Бурхонжон Очилов тиланчилик билан шуғулланувчи турк фуқароси томонидан пичоқлаб ўлдирилди. Бу ҳақда Effect.uz сайти хабар қилди (видео).
Ҳодиса 8 декабрь куни 18:00 ларда Малтепа туманида содир бўлган. Бир неча бор судланган, қамоқдан гаров эвазига озодликка чиққан ва тиланчилик билан шуғулланиб келаётган 27 ёшли Бедир Г. исмли турк фуқароси кечқурун дўконга келиб, ўзи учун нарса сотиб олмоқчи бўлади.
Дўконга келган Бедир Г. билан дўкон дилерига курьерлик қилган Бурхонжон Очилов ўртасида низо келиб чиқади. Гувоҳларнинг сўзларига кўра, Очилов Бедир Г. га «Нега ишламаяпсиз, мен хатто бошқа бир жойдан келганман, ишлаяпман», деб танбеҳ берган. Можаро авж олиб, ўзбекистонликнинг пичоқланиши билан якун топади.
Қайд этилишича, воқеа жойидан қочиб кетган Бедир Г. полиция томонидан ушланиб, ҳибсга олинган. Унинг 24 йил муддатга озодликдан маҳрум этилгани хабар қилинди.
Марҳумнинг жасади яқинлари томонидан Ўзбекистонга юборилган.
