Жума куни кечқурун Урганчдаги «Ашхобод» маҳалласидаги уйлари бузилагн одамлар Хонқа туманига олиб борадиган йўлни тўсиб қўйди. Ижтимоий тармоқларда пайдо бўлган ушбу маълумотни Хоразм вилояти матбуот хизмати «Газета.uz"га тасдиқлади. Вилоят маъмуриятининг қайд этишича, норозилик акциясида 200 га яқин киши қатнашган.

Одамларнинг норозилигига бузилган уйлари учун товон пулининг тўланмагани сабаб бўлган. Маҳалла аҳолисига кичик саноат зонаси қурилиши учун бузилган уйллари учун Урганч туманидаги Чандирқиёт посёлкасидан ер участкалари ажратилган. Улардан кўпчилиги бир неча ҳафтадан буён уйларидан қолган материаллардан қурилган вақтинчалик бошпаналарда яшамоқда.

Шаҳар ҳокимияти аҳоли билан имзолаган келишувга кўра, улар мол-мулклари баҳосининг ярмини, бузиш тугаганидан кейин эса қолган ярмини олиши керак эди. Бироқ шартнома шартлари бажарилмаган.

"Газета.uz"да реклама

Вилоят ҳокимиятининг хабар қилишича, кечаси йиғилганлар олдига вилоят ҳокими Фарҳод Эрмонов бориб, одамларни тинчлантиришга ҳаракат қилган ва эрталаб барча масалаларни ҳал қилиш учун қайтишга ваъда берган. Шундан сўнг тўсилган йўлда ҳаракат қайта тикланган.

Шанба куни 7:30—8:00 да ҳоким бошчилигидаги махсус ишчи гуруҳи ҳодиса жойига бориб, ҳар бир оила билан суҳбатлашди, дея маълум қилди ҳокимлик матбуот хизмати. Фарҳод Эрмонов одамларни уч иш куни давомида (чоршанбагача) ваъда қилинган 50 фоиз, 10 августга қадар эса 100 фоиз товон пулини тўлашга ваъда берган. Бунда товон пули бузилган уйлардан чиққан қурилиш материаллари ҳисобига пул ушлаб қолишларсиз, тўлиқ тўланиши лозим.

Бир қанча оилаларнинг илтимосларига кўра, тақдим этилаётган ер майдони ҳажми оширилади. Бундан ташқари, одамларга бепул қум, балки шағал ажратиш, шунингдек, сотиб олинаётган қурилиш материаллари учун 10 фоизлик чегирмага эришиш ваъда қилинди, дея хабар берди ҳокимлик.