АҚШ президенти Жо Байден маъмурияти ўтган ҳафта Исроилга АҚШда ишлаб чиқарилган ўқ-дориларни етказиб беришни тўхтатди. Бу ҳақда Исроилнинг икки расмийсига таяниб, Axios хабар берди.
Нашрнинг ёзишича, бу бир марталик кечикишми ёки етказиб беришнинг вақтинчалик тўхтаб қолиши — аниқ эмас. Манбалар етказиб бериш нима учун тўхтаганига аниқлик киритмаган.
Уларнинг сўзларига кўра, 2023 йил октябрь ойида ҲАМАСнинг Исроилга ҳужумидан сўнг биринчи марта содир бўлган таъминотнинг тўхтатилиши Исроил ҳукуматида жиддий хавотир уйғотган ва бу ҳодиса сабабларини ўргана бошлаган.
Axios`нинг таъкидлашича, снарядларни етказиб беришдаги кечикиш АҚШда Байден Исроилга ёрдам бераётгани ҳақидаги танқидлар фонида содир бўлган.
Бундан ташқари, АҚШ президенти маъмурияти Исроилнинг фаластинлик қочқинлар бошпана олаётган Ғазо сектори жанубидаги Рафаҳ шаҳрида қуруқликдаги операция ўтказиш режасидан хавотирда экани келтирилган. Оқ уй Исроилга мамлакат армиясининг Рафаҳдаги амалиёти АҚШнинг Ғазодаги урушга нисбатан сиёсатига таъсир қилишини аниқ билдириб ўтган, деб ёзади нашр.
Ўз навбатида, исмини ошкор этмаган исроиллик яна бир расмий Ynet билан суҳбатда Қўшма Штатлар Исроилга қурол етказиб беришда давом этаётганини айтган. «Эҳтимол, у ёки бу жўнатиш кечикиши мумкин, аммо етказиш оқими давом этмоқда ва биз уни тўхтатиш бўйича сиёсий қарордан хабардор эмасмиз», — дея қўшимча қилди у.
Қайд этилишича, Исроил бош вазири Беньямин Нетаньяху сўнгги кунларда Исроил ва ҲАМАСнинг исроиллик гаровга олинганларни озод қилиш ва ўт очишни тўхтатиш бўйича келишувга эришганидан қатъи назар, Рафаҳга бостириб киришга буйруқ бериш ниятида экани ҳақида бир неча бор баёнот берганди.
