Жиззах вилояти Шараф Рашидов туманидаги уйлардан бирида оғир тан жароҳатлари билан 25 ёшли аёлнинг жасади топилди. Ушбу қотилликда унинг эри гумон қилинмоқда, деб хабар берди «Миллар» теледастури.
Марҳумнинг опасининг сўзларига кўра, ҳаёти давомида эр-хотин ўртасида доимо низолар келиб чиққан.
«Келин бўлиб тушган вақтдан бери уларни жанжали тугамади. 2022 йилда қаттиқ жанжал бўлган, [эр] қаттиқ урган, шундан сўнг у ота-онасининг уйига қайтиб келган. «Селсовет»дагилар яшасин, деган, ҳимоя ордери олиб берилган», — деди опаси.
Бошқа опаси эса унинг қандай ўлганини билмаслигини, лекин марҳумнинг уч ёшли ўғли отаси онасини таёқ билан урганини айтганни таъкидлади.
Маҳалла фаолларидан бири ҳам вазиятга изоҳ берди. Унинг сўзларига кўра, марҳум яхши аёл бўлган ва уларнинг уйи доим тоза бўлган.
«Марҳумнинг эри уйни тозаламаганидан шикоят қиларди. Қолаверса, у Telegram ва Instagram’да кимдир билан ёзишаётганини кўриб, жанжал қилган. Менимча, унинг бу ҳаракатига асосий сабаб рашк эди», — дейди маҳаллий фаоллардан бири.
Аниқланишича, гумонланувчи турмуш ўртоғини қасддан бир неча марта уриб, оғир тан жароҳатлари етказган, кейин эса бўғиб ўлдирган.
Ҳозирда ҳолат юзасидан вилоят прокуратураси томонидан жиноят иши қўзғатилиб, тергов ҳаракатлари олиб борилмоқда.
