Тошкент шаҳри Чилонзор туманида дарахт қулаши оқибатида 1 ёшли қиз вафот этгани юзасидан жиноят иши қўзғатилди, деб хабар бермоқда Бош прокуратура матбуот хизмати раҳбари Ҳаёт Шамсутдинов.
Қайд этилишича, иш Жиноят кодексининг 186-моддаси 3-қисми (Хавфсизлик талабларига жавоб бермайдиган товарларни ўтказиш мақсадини кўзлаб ишлаб чиқариш, сақлаш, ташиш ёхуд ўтказиш, ишлар бажариш ёки хизматлар кўрсатиш, 5 йилдан 7 йилгача озодликдан маҳрум қилиш билан жазоланади) бўйича очилган.
Текширишда сув қувурларини таъмирлаш ишларини амалга ошираётган ишчилар хавфсизлик чораларига риоя қилмасдан, махсус техника ёрдамида қазиш ишларини олиб боришлари оқибатида бир туп дарахтнинг илдизи очилгани ва ўз вазнини кўтара олмай, йиқилгани аниқланган, дейилади хабарда.
Тергов ҳаракатлари олиб борилмоқда.
Ҳодиса ҳақида нималар маълум?
Kun.uz ҳодиса нашрининг ёзишича, дарахт қулашига Veolia Energy Tashkent иссиқлик етказиб бериш компанияси ходимлари ва бошқа масъул идораларнинг масъулиятсизлиги сабаб бўлган.
Ўша ердаги чиқиндихона ходимининг айтишича, дарахт қулаган вақтда бола ва аёлнинг устига каттагина шох келиб тушган.
«Мен [чиқиндихонада] ишлаётгандим, қарсиллаган товуш эшитилди. Қарасам, бир аёл «коляска»да болачаси билан нариги бетдан келаётган экан. Мен кўргандим келаётганини, қарсиллаган вақтда кўрсам, дарахт қулабди. Битта новдачаси келиб энагаси билан болага тушди. Аёлнинг елка ва қўлини сийириб [шилиб], боланинг бошига тушди. Боланинг юзи кўм-кўк бўлиб қолди. Тез ёрдам келгунча бола типирчилаб ўлиб қолди. Боланинг онасини телефон қилиб чақиришди, ёшгина қиз ишдан етиб келди», — деган воқеа гувоҳи.
Дарахтнинг қулаши оқибатида ҳудудда яшовчи фуқаролардан бирининг автомобилига ҳам зарар етгани маълум қилинди.
«5 кун олдин қазиб кетишганди. Иш бошлашдан олдин қилиш керак эди-ку ҳамма ишни. Дарахт яхши турганди, экскаватор ковлагандан кейин илдизи билан ағанаб тушган», — дейди автомобилига зарар етган фуқаро.
«Иссиқлик тизимини таъмирламоқчи бўлишган, сув оққан, шуни тузатмоқчи бўлишган. Келсам шу ҳолат, бир нарса дея олмайман, мен ҳам шокдаман. Тошкент шаҳри экология бошқармасига қуриган дарахтларни кесиш бўйича сўров юборилган. Маҳалла „обод маҳалла“ дастурига тушган, ҳар бир қуриган дарахт бўйича сўров берилган. Навбат-навбат билан кесиб, тайёрлаб келишган эди», — деди «Техно ҳудуд» БСК раҳбари Алимардон Валижонов.
Тошкент шаҳри ботаника боғи бўлим бошлиғи Атиргул Холмирзаеванинг айтишича, қулаб тушган дарахтнинг ёши жуда катта бўлиб, у илдиз қисмидан чириб бўлган, юқори шохлари эса қуриб кетган.
«Бу дарахтнинг биологик ёши тугаган, охирги йилларини яшаётган бўлган. Биринчидан, бунинг таги иссиқ сув, парланиб ётганини кўряпсизми? Бу пар қаерга боради, дарахтга боради. Ўзи тамом бўлиб турган дарахтни баттар чиритиб юборган. Унинг тагларида ушлаб турадиган илдизи йўқ. Илдизлари чириган, таги юмшатилганидан кейин оғирлик шохлари томон қулаган. Илдизи ушламаганидан кейин қаер оғир бўлса, ўша ерга қараб эгилиб кетган», — дейди Холмирзаева.
«Буларда ҳам айб бор, шу жараённи амалга ошираётганда бу ерга одам келмаслиги учун атрофига муҳофазаловчи нарсаларни қўйиши керак эди. Ёки шу ерда яшовчи одамлардан қўйиб, бу ерда юрмаслигини таъминлаши керак эди. Шаҳарда бунақанги ёши катта дарахтлар жуда кўп. Шунинг учун Экология [вазирлиги] эксперт комиссия қиладими, бошқа қиладими, ботаника боғи, ўрмон хўжалигидан вакиллар билан юриб, шу дарахтларнинг ҳаммасига хулоса бериши керак. Бўлмаса, бундай ҳолатлар бўлаверади», — дея таъкидлади мутахассис.
Таҳририятнинг қўшимча қилишича, қулаган дарахтнинг ёнини қазиш учун тегишли ташкилотлардан рухсат ҳам олинмаган бўлиши мумкин.
