Ўзбекистон футболчилари U-23 Осиё кубогида Индонезияни 2:0 ҳисобида мағлуб этиб, тарихда илк бор Олимпиада йўлланмасини қўлга киритди. ЎФА жамоа бош мураббийи Тимур Кападзе мазкур ўйин олдидан шогирдлари билан қилган мулоқот акс этган видеони эълон қилди.
Кападзе ўз шогирдларига мухлислар босимига аҳамият бермай, ҳал қилувчи ўйинда концентрацияни сақлаб қолган ҳолда ўйнаш кераклигини таъкидлаган.
«…Майдондасизлар, ўйинга қаранглар нима бўлаётганини, болалар. Эшита олмаслигимиз мумкин, лекин концентрацияни йўқотманглар, тушундиларингми?! Мен сизларга яна бир марта айтаман, яна бунақа стадион, яна иккитаси келиб мухлислик қилса ҳам биз мақсадимиздан воз кечмаймиз, тушунарлими?! Ишонч билан ўйнанглар. Худо куч-қувват берсин», — дея йигитларга далда берди у.
Терма жамоа билан ишлаётган яна бир мураббий Жасур Абдураимов ҳам ёшларни руҳлантирган.
«4 йилдан бери ҳар куни шу мақсад билан Парижга бориш учун, ҳар куни шу орзу билан яшаймиз. Болалар, шу имконият бўлди, ундан минг фоизда фойдаланайлик! Аллоҳ юзимизни ёруғ қилсин», — деди мураббий.
Аввалроқ Абдураимов олимпия терма жамоа мусобақага узоқ вақт тайёрлангани, энг муҳими, йигитларни миллий мураббий олимпиадага олиб чиққанини олқишлашини айтганди.
Эслатиб ўтамиз, терма жамоа финал ўйинида 3 май куни соат 20:30 да чемпионлик учун Япония ёшлар терма жамоасига қарши баҳс олиб боради.
