Бош вазир қарори билан Қишлоқ хўжалиги вазирлиги ҳузуридаги иккита ташкилотда тайинловлар амалга оширилди, деб хабар бермоқда унинг матбуот котиби.
Шухрат Абдумажидович Джаббаров Қишлоқ хўжалиги вазирлиги ҳузуридаги Ветеринария ва чорвачиликни ривожлантириш қўмитаси раисининг биринчи ўринбосари этиб тайинланди.
У 1978 йилда Самарқанд шаҳрида туғилган. Маълумоти олий — 1999 йилда Самарқанд қишлоқ хўжалиги институтининг ветеринария факультетини, 2002 йилда Самарқанд иқтисодиёт ва сервис институтининг молия факультетини (сиртқи) тамомлаган. Мутахассислиги — ветеринария шифокори, молиячи.
Абрар Акмалович Акбаров эса қўмита раисининг ўринбосари бўлди. У 1981 йилда Тошкент вилояти Янгийўл туманида туғилган. Олий маълумотли: 2004 йилда Самарқанд қишлоқ хўжалиги институтини, 2023 йилда Беларуснинг Витебск ветеринария медицинаси академиясини тамомлаган. Мутахассислиги — ветеринария шифокори.
Вазирлар Маҳкамасининг тегишли қарорига мувофиқ, Бобир Зохир ўғли Хамраев Ўсимликлар карантини ва ҳимояси агентлиги директорининг биринчи ўринбосари этиб тайинланди.
Бобир Хамраев 1983 йилда туғилган. 2006 йилда Тошкент давлат аграр университетини тамомлаган. 2005 йилдан 2011 йилгача турли ташкилотларда директор ўринбосари лавозимларида фаолият юритиб келган. 2021−2022 йилларда Ўсимликлар карантини ва ҳимояси агентлиги Ўсимликлар зараркунандалари, касалликлари ва бегона ўтларига қарши курашишни мувофиқлаштириш бош бошқармаси бошлиғи ўринбосари сифатида фаолият олиб борган.
Улуғбек Мамаджанович Юнусов эса агентлик директорининг ўринбосари этиб тайинланди.
Бобир Хамраев ва Улуғбек Юнусов тайинлов муносабати билан директор ўринбосари вазифасини бажарувчи лавозимидан озод қилинди.
