Ўзбекистонлик гроссмейстер Нодирбек Абдусатторов (FIDE рейтингида 2713 коэффициент) 12−28 январь кунлари Вейк-ан-Зее шаҳрида бўлиб ўтадиган шахмат бўйича Tata Steel Chess 2024 супертурнирида иштирок этади.

Турнир ҳақида

Вейк-ан-Зее ёки Tata Steel Chess Tournament — шахмат бўйича энг қадимги ва номдор турнирлардан бири бўлиб, бу йилги турнир 86-си бўлади. У 1938 йилдан бери ўтказиб келинмоқда. Василий Смислов ва Роберт Фишердан ташқари барча жаҳон чемпионлари турли йилларда унинг иштирокчиларига айланган.

Турнир давравий тизимда ўтказилади ва 13 турдан иборат. Вақт назорати: 40 та юриш учун 100 дақиқа, сўнг 20 та ҳаракат учун 50 дақиқа ва ўйин сўнгига қадар 15 дақиқа. Бунда дастлабкисидан бошлаб ҳар бир юриш учун 30 сония қўшилади.

Иштирокчилар ҳақида

Бу йил турнир саккиз карра ғолиб Магнус Карлсен иштирокисиз ўтказилади. Расмий баёнотга кўра, шахматчи жуда банд экани учун турнирда иштирок этолмайди.

"Газета.uz"да реклама

Амалдаги жаҳон чемпиони Дин Лижэнь узоқ танаффусдан сўнг катта ва жиддий турнирларга қайтмоқда. У рейтинг бўйича Tata Steel Masters мусобақаси иштирокчилари бошланғич рўйхатининг энг юқори қисмида жойлашган.

Мусобақада 2023 йилда чемпионлик унвонини ҳимоя қилган аёллар ўртасидаги жаҳон чемпиони Цзюй Вэньцзюнь ҳам иштирок этади. У рейтингга кўра иштирокчилар бошланғич рўйхатини якунлаб беради.

Бу галги турнир таркибининг ўзига хослиги шундаки, унда амалдаги учта чемпион: эркаклар ўртасидаги шахмат тожи соҳиби Дин Лижэнь, аёллар ўртасидаги жаҳон чемпиони Цзюй Вэньцзюнь ва 2023 йилги Tata Steel Masters чемпиони Аниш Гири иштирок этади.

Тўлиқ таркиб

  1. Дин Лижэнь (2780 коэффициент билан FIDE жаҳон рейтингида 4-ўрин);
  2. Ян Непомняший (5-ўрин, 2769);
  3. Алиреза Фирузджа (6-ўрин, 2759);
  4. Аниш Гири (10-ўрин, 2749);
  5. Рамешбабу Прагнанандха (13-ўрин, 2743);
  6. Видит Гуджрати (14-ўрин, 2742);
  7. Пархам Магсудлу (15-ўрин, 2740);
  8. Вэй И (16-ўрин, 2740);
  9. Нодирбек Абдусатторов (22-ўрин, 2727);
  10. Гукеш Доммараджу (25, 2725);
  11. Йорден ван Форест (52-ўрин, 2682);
  12. Александр Донченко (98-ўрин, 2643);
  13. Макс Вармердам (130-ўрин 2625);
  14. Цзюй Вэньцзюнь (382-ўрин, 2549).

Ўтган йили Нодирбек Абдусатторов Tata Steel Chess турнирида сенсацион тарзда иккинчи ўринни эгаллаган ва турнир давомида ўша пайтдаги чемпион Магнус Карлсенни мағлубиятга учратган, аммо аутсайдер Йорден ван Форестга имкониятни бой бериб қўйганди.

Шунингдек, у ушбу турнирда иштирок этган иккинчи ўзбекистонлик шахматчи ҳисобланади. Абдусатторовдан ташқари, турнирда 2009 йилда жаҳон чемпиони Рустам Қосимжонов ҳам қатнашган.