Халқ депутатлари Тошкент шаҳри кенгаши ҳокимликнинг шаҳар рейтингини баҳолаш учун Fitch халқаро рейтинг агентлигини жалб этиш тўғрисидаги таклифини маъқуллади. Бу ҳақдаги кенгаш қарори 29 декабрь куни тасдиқланди.
Ўзбекистон пойтахти биринчи марта 2019 йил июнь ойида Fitch рейтингини олган. Агентлик тақдим этган кредит рейтинги ва ҳисобот шаҳарнинг молиявий саломатлиги ва кредитга лаёқатлилиги ҳақида муҳим маълумот манбаси бўлган.
2023 йилнинг декабрь ойи бошида агентлик Тошкентнинг «барқарор» прогнози билан «BB-» даражасида бўлган хорижий ва миллий валютадаги узоқ муддатли кредит рейтинглари қайтариб олинишини эълон қилди. Бу қарор Тошкентнинг «рейтинг жараёнида иштирок этишни тўхтатишга қарор қилгани» сабабли қабул қилинди.
«Эндиликда агентликда асосий кредит омилларини, шу жумладан, солиқ-бюджет ва қарзни бошқариш сиёсатини текшириш учун етарли маълумотлар мавжуд эмас». Шу сабабли молия институти бундан буён Ўзбекистон пойтахти бўйича рейтинг ва таҳлилий ҳисоботларни тақдим этмайди, дея қайд этганди агентлик.
Кенгаш Тошкент шаҳри ҳокимлигининг рейтинг жараёнида иштирок этишни тиклаш ҳақидаги таклифини маъқуллаб, Fitch Ratings агентлиги билан шартнома тузиш ва бунинг учун маҳаллий бюджетнинг қўшимча манбаларидан маблағ ажратиш бўйича қарор қабул қилган.
Кенгаш, шунингдек, рейтинг агентлиги билан ҳамкорликда иш олиб борувчи ва шаҳарнинг халқаро рейтингдаги ўрнини аниқлашда зарур маълумотларни тақдим этувчи ишчи гуруҳ таркибини ҳам тасдиқлади. «Аниқ ва ишончли» маълумотлар агентлик сўровига асосан беш кун ичида, «ўз вақтида ва сифатли» тақдим этилиши керак.
Fitch 2022 йил декабрь ойидаги сўнгги ҳисоботида Ўзбекистонда амалга оширилаётган солиқ-бюджет ислоҳотлари фонида пойтахт даромадлари барқарорлигини «заифроқ» ва «беқарор» деб баҳолаган. Тошкент шаҳри томонидан йиғиладиган солиқ тушумлари таркиби ва уларни турли даражадаги давлат органлари ўртасида тақсимлаш марказий ҳокимият қарорларига кўра доимий равишда ўзгариб туради, дея қайд этган агентлик.
