Qashqadaryo viloyati va Toshkent shahrida tabiiy resurslardan noqonuniy ravishda foydalangan tadbirkorlar aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Xususan, departamentning Qashqadaryo viloyat boshqarmasi tomonidan o‘tkazilgan tergovga qadar tekshiruvda “N-K.” MCHJ rahbari X.X. va boshqalar Qarshi shahri “G‘afur G‘ulom” MFY ko‘chasidagi shirinlik mahsulotlari ishlab chiqarish binosini hech qanday hujjatsiz tijorat maqsadida umumiy foydalanishdagi gaz tarmog‘iga o‘zboshimchalik bilan ulab, jami 1 mlrd so‘mlik tabiiy gazdan noqonuniy foydalangani aniqlangan.
Shu kabi, departamentning Mirzo Ulug‘bek tuman bo‘limi tomonidan DXX va ETK xodimlari hamkorligida o‘tkazilgan tergovga qadar tekshiruvda “Y.N.” MCHJ mas’ul shaxslari Yashnobod tumani Tuzel-1 massivida joylashgan mebel ishlab chiqarish sexidagi elektr hisoblagichga qasddan shikast yetkazib, jami 1 mlrd so‘mlik elektr energiyasidan noqonuniy foydalangani aniqlangan.
Holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda, deyiladi xabarda.
