2005-yilning 13-may kuni Andijon shahrida ko‘plab odamlarning qurbon bo‘lishiga hamda fuqarolar va davlat mulkiga katta moddiy zarar yetkazilishiga olib kelgan fojiali hodisalar yuz bergan edi.

O‘zbekiston rahbariyati ushbu hodisalarni terakt deb baholagan. Andijondagi voqealarga bag‘ishlab 17-may kuni o‘tkazilgan va prezident Islom Karimov ham qatnashgan matbuot anjumani haqidagi O‘zbekiston Milliy axborot agentligi (O‘zA) axborotida, jumladan, shunday deyiladi: «Islom Karimov qat’iy ta’kidladiki, bo‘lib o‘tgan voqealarning tinch namoyishga hech qanday aloqasi yo‘q, bu haqda gap ham bo‘lishi mumkin emas. Bu haqiqiy terrorchilik harakatidir».

Oradan to‘rt oy o‘tib, Bosh prokuratura mamlakat rahbariyatining nuqtai nazarini tasdiqlagan: “Tergov davomida Andijondagi terrorchilik harakatlari tashqi buzg‘unchi kuchlar tomonidan O‘zbekistonning mustaqil siyosatiga, uning milliy manfaatlariga qarshi puxta rejalashtirilgan va tashkil etilgan xuruj bo‘lib, mavjud konstitutsiyaviy tuzumni o‘zgartirish va bu kuchlarning geosiyosiy manfaatlariga to‘liq javob beradigan islom davlatini tuzishga qaratilgani aniqlandi”.

Rasmiy ma’lumotlarga ko‘ra, Andijon voqealari davomida 73 ta avtomobilga, 20 ta binoga o‘t qo‘yilgan. “Terrorchilik harakatlari oqibatida jami 187 kishi halok bo‘lgan, ulardan 60 nafari tinch aholi bo‘lib, ularning ikkitasi voyaga yetmagan bola va bittasi ayoldir. Terrorchilar tomonidan 31 nafar huquqni muhofaza qilish organlari xodimi va harbiy xizmatchi o‘ldirilgan. Jinoyatchilar 70 kishini garovga olib, ulardan 15 nafarini vahshiyona o‘ldirgan”, - deyiladi idoraning 2005 yil sentyabridagi hisobotida. Yana 287 kishi (ularning 91 nafari tinch aholi, 49 nafari organ xodimlari) yaralangan.

Qurbonlar soniga doir rasmiy raqamlar xalqaro jamoatchilik tomonidan ko‘p marta shubha ostiga olingan. Bu shubhalar va tanqidlar O‘zbekiston rasmiylari tomonidan rad etilgan. “Andijonda 500 ta, 1000 ga yaqin odam halok bo‘ldi degan gaplar – noto‘g‘ri”, – degandi Andijon voqealari vaqtida O‘zbekiston rahbariyati tomonidan tuzilgan shtabga boshchilik qilgan va qurollangan shaxslar bilan muzokaralar olib borgan IIVning o‘sha vaqtdagi rahbari Zokirjon Almatov.

500 dan ziyod tinch aholi vakili halok bo‘lgani, odamlarga qarata o‘t ochish haqida buyruq berilgani haqidagi gap-so‘zlarni 2005-yildayoq prezident Islom Karimov ham, O‘zbekistonning o‘sha vaqtdagi bosh prokurori Rashid Qodirov ham rad etgan. Oradan 15 yil o‘tib bosh prokuror o‘rinbosari Svetlana Ortiqova “Qalampir.uz”ga bergan intervyusida tinch aholi o‘qqa tutilganini tan olgan. O‘z navbatida, Zokirjon Almatov “Kun.uz”ga bergan intervyusida tinch aholi o‘qqa tutilgani haqidagi gaplarni yana bir bor rad etgan.

“Tinch aholiga o‘q uzilgan deyishadi. Yo‘q. 12 soat oldin ularning 600-700 nafar oila-a’zolarini Qirg‘izistonga chiqarib yuborganmiz. Bular kelayotganda harbiy qismdagi kapitanni otib qo‘yishgan. Keyin oddiy askarlar nima qiladi? Ikki tomon o‘rtasidagi otishma sabab bitta joyda 100 kishi o‘lgan. Ularning ichida bizning xodimlar ham, terrorchilar ham bo‘lgan. Jami 187 kishi o‘lgan. Allohning oldida rost gapni gapiraman – bu aniq raqamlar”, – degan Zokirjon Almatov.