2024 йил 19 апрель куни Тошкент шаҳар жиноят ишлари бўйича Чилонзор туман судида шаҳарлараро автобусда аёлга шилқимлик қилган шахс устидан суд бўлиб ўтди. «Газета.uz» суд қарори билан танишиб чиқди.
Қайд этилишича, суд мажлисида сўроқ қилинган жабрланувчи аёл 2023 йил 15 ноябрь куни Сурхондарё вилояти Термиз шаҳри автовокзалидан Тошкент шаҳрига келаётган автобусда кетаётган бўлган. Унинг ёнидаги ўриндиқда ўтирган А.Р. (1979 йилда туғилган, эркак) аёл ухлаб қолганидан фойдаланиб унинг кийимини ечиб, кўкрак қисмига тегинган. Шундан сўнг аёл уйғониб кетган ва автобус ҳайдовчисига бўлган воқеани айтган.
Шу вақт А.Р. аёл билан жанжаллашиб уни ҳақорат қилган. Кейин аёл акасига қўнғироқ қилиб, ҳолатни айтганида эркак аёлнинг акасини ҳам ҳақорат қилиб, автовокзалда жанжал қилиб, оммани ўзига қаратган.
Судда аёл бу ҳолат 2023 йил 15 ноябрь ойида содир бўлганига қарамасдан ИИО ходимлари А.Р.га нисбатан қонуний чора кўрмаганини, ҳуқуқбузарга нисбатан қонуний чора кўришни сўради.
Суд мажлисида сўроқ қилинган ҳуқуқбузар А.Р. 2023 йил 15 ноябрь куни Термиз шаҳри автовокзалидан Тошкент шаҳрига келаётган автобусда бўла туриб, ёнида ўтирган аёлга қўли тегиб кетганини, ҳозирги кунда қилган ишидан пушаймон эканини, унга нисбатан енгиллик беришни сўради.
Суд А.Р. Маъмурий жавобгарлик тўғрисидаги кодекснинг 183-моддаси (Майда безорилик) ва 41−1-моддаси 1-қисмида (Шаҳвоний шилқимлик қилиш) назарда тутилган ҳуқуқбузарликларни содир қилган деб топди ва унга нисбатан 15 (ўн беш) сутка маъмурий қамоқ жазоси тайинланади.
