Бош прокуратура 2021 йилда 2804 нафар мансабдор шахс жиноий жавобгарликка тортилганини, уларнинг жинояти оқибатида эса давлатга 913,7 млрд сўмлик моддий зарар етганини маълум қилди. Мансабдорларнинг 1741 нафари растрата, 269 нафари фирибгарлик, 165 нафари пора олиш ва бериш, 41 нафари мансаб сохтакорлиги каби жиноятни содир этган.
Давлат божхона қўмитаси Тошкент туманида 77 кг гиёҳвандлик воситасини қопларда картошка кўринишида яшириб, хорижий давлат фуқаросига етказиб бермоқчи бўлган шахсларни қўлга олди. Уларга нисбатан жиноят иши қўзғатилди.
Тўдакўл сув ҳавзасида қора ниқобдаги назоратчи инспекторлар ва балиқчилар ўртасида келишмовчилик юзага келди. Вилоят ИИБ формадаги шахслар «Ички ишлар ходими эмаслиги ва эгнидаги либоси, вазирлик шеврони ҳамда резина таёқларни қаердан олгани» ўрганилаётганини маълум қилди. Ҳолат юзасидан ЖКнинг безорилик моддаси билан жиноят иши қўзғатилди.
Тошкент шаҳар ИИББ ўт ўчиргич ёқиб юборилган ҳолат юзасидан 4 кишига нисбатан жиноят иши очилганини маълум қилди.
Февраль охирида Чилонзордаги «Шовотландия» кафесида ёнғин чиқиб, бунинг оқибатида 5 киши вафот этганди. ЖИБ Олмазор туман суди ушбу жиноятни содир этган 36 ва 26 ёшли шахсларга умрбод озодликдан маҳрум қилиш жазосини тайинлади. «Газета.uz» жиноят нима сабабдан ва қандай содир этилганини ҳам аниқлаштирди.
Қибрай туманида қишлоқ хўжалиги маҳсулотларини етиштиришга мўлжалланган 13,7 гектар ер майдонини 3,4 млн долларга сотмоқчи бўлган шахслар ушланди. Ноқонуний равишда ер сотишга уринишлар Сирдарё, Наманган ва Самарқанд вилоятларида ҳам қайд этилди.
Деновдаги савдо марказида юзага келган портлашда шаҳар газ бўлими бошлиғи ҳамда Ҳудудгаз Сурхондарё газтаъминотининг 2 нафар ходими айбдор деб гумон қилиниб, қамоққа олинди. Улар ўз вазифаларини лозим даражада бажармаганлик ва моддий қимматликлар олганликда айбланмоқда.
Суд метро вагонида 13 ёшли қизга ножўя ҳаракатлар қилган шахсни айбли деб топиб, унга нисбатан 2 йил аҳлоқ тузатиш ишлари жазосини тайинлади.
Бухоро вилоятининг Когон шаҳридаги сув қувури ётқизилиш вақтида тупроқ ўпирилишидан 2 киши ҳалок бўлган эди. Ҳолат юзасидан меҳнатни муҳофаза қилиш қоидаларини бузиш одам ўлишига сабаб бўлса моддаси билан жиноят иши қўзғатилди.
Бўстонлиқ туманидаги «Амирсой» курорт зонасида 700 туп атрофидаги қимматбахо дарахтларни кесиб ташлагани юзасидан жиноят иши қўзғатилди. Табиатга етказилган зарар 1,9 млрд сўм этиб баҳоланмоқда.
Жиззахда 2 нафар фуқарони 18 минг АҚШ доллари эвазига хориж университетларидан бирига киритиб қўймоқчи бўлганлар ушланди. Фирибгарлик ва пора бериш моддалари билан жиноят иши қўзғатилди.
Қашқадарёда уч нафар фуқаро 6 синф ўқувчисига икки баҳо қўйган ўқитувчининг юзини бир неча маротаба уриб, калтаклашган. Ҳолат юзасидан жиноят иши қўзғатилди.
Тошкент вилоятидаги 3 та шаҳар ва 3 та туман аҳолисини тоза ичимлик суви билан таъминлаш учун ажратилган 500 млнга яқин пул маблағлари талон-торож қилингани аниқланди.
Самарқандда хотинини хиёнатда гумонсираб, уни ва у билан бўлган эркакни савдо марказида пичоқлаб ўлдирган фуқарога 22 йил муддатга озодликдан маҳрум қилиш жазоси тайинланди.
Тошкент шаҳрида 3 нафар фуқаро тадбиркорни алдов йўли билан уйига олиб келиб, дўппослаб, маълум бир вақт ушлаб туришган. Тадбиркорни қўйиб юбориш учун унинг яқинларидан 29 минг доллар пул олишига қарамай, яна пул талаб килинган. Рад жавобини олган жиноятчи тадбиркорни ўлдириб, мурдасини бўлаклаб кўмган. Тадбиркорнинг қотили 25 йилга, унинг жиноий шериклари эса 15 ва 13 йилга озодликдан маҳрум этилди.
Зангиота туманида машина трактор парки раҳбари фуқарога фермер хўжалигига қарашли 30 сотих ерни 27,7 минг АҚШ долларига сотмоқчи бўлган. Олдиндан 10 минг 300 долларни олган вақтида ашёвий далил билан ушланди. Ҳолат юзасидан жиноят иши қўзғатилди.
Бош прокуратура департаменти Тошкент ва Ромитан туманларида тадбиркорлар 2,7 млрд сўмлик газ ўғирланганини аниқлади. Улар сарфлаган миқдор қиш мавсумида 200 тагача хонадонни узлуксиз газ билан таъминлашга етиши маълум бўлди. Ишбилармонларга нисбатан жиноят иши қўзғатилди.
Тошкент шаҳрида 17 ёшли мактаб ўқувчиси оилавий келишмовчилик туфайли 48 ёшли отасини пичоқлаб қўйди. Тан жароҳати оқибатида фуқаро вафот этган.
Самарқанд вилоятининг Ургут туманида ҳокимият ходимлари эркин иқтисодий зонадан 1 гектар ерни фуқарога бериш эвазига 30 минг АҚШ долларини талаб қилгани аниқланди. Ходимларга нисбатан жиноят иши қўзғатилди.
Бухоро вилоятида шаҳар маданият бўлими собиқ раҳбари бўлимга тегишли 24 дона «LED» экранларини белгиланган талабларга зид равишда ҳисобдан чиқарганликлари аниқланди. Умумий ҳисобда 263,5 млн сўмлик давлат мулки талон-торож қилинганлиги маълум бўлган.
Қўшимча имкониятларга эга булиш учун сайтда рўйхатдан ўтинг