Жамият
25 апрель куни Ўзбекистонда содир бўлган энг муҳим хабарлар дайжести
Тошкентда ОИТСга чалиниб беморларни даволаб келган стоматолог, Эммануэль Макронни сайловдаги ғалабаси билан табриклаган Шавкат Мирзиёев, тест топшириладиган фанлар мажмуаси тасдиқлангани, 9 майда ўтказилмайдиган ҳарбий парад, Рамзан Қодировга Рамазон ҳайити арафасида табрик йўллаган президент, Тошкентда трамвайни қайта тиклаш лойиҳасига қўшилмоқчи бўлган Беларусь ва бошқалар — «Газета.uz» нинг 25 апрелдаги энг муҳим хабарлари дайжестида.
Лицензия олиш жараёнида ноқонуний ҳужжат кузатилмаган — СЭС «Гуангжоу» клиникаси ҳақида
СЭС бошлиғи ўринбосари Ботир Қурбонов «Гуангжоу» клиникасининг Тошкент шаҳри ва бошқа вилоятлардаги филиаллари лицензия олиши жараёнида ноқонуний ҳужжат кузатилмаганини маълум қилди. Агарда ноқонуний ҳолат кузатилса, лицензия берилмаган бўларди, дея таъкидлади у.
Малакаси етарли бўлмаган ҳайдовчилар машинани махсус белги билан ҳайдайди
1 майдан бошлаб икки йилдан кам ҳайдовчилик тажрибасига эга ҳайдовчиларнинг автомобилларида махсус «Ҳайдовчиликни энди бошлаган» белгиси бўлиши шарт.
Никоҳланувчилар ўз ҳисобидан генетик текширувдан ўтишади
2023 йил 1 июлдан никоҳланувчилар генетикларнинг хулосаси билан турмуш қуришади. Бунда фуқаролар репродуктив саломатлик марказлари орқали ўз ҳисобларидан молекуляр-генетик тестдан ўтишлари керак бўлади.
Ўзбекистонда 9 май куни ҳарбий парадлар ўтказилмайди — Мудофаа вазирлиги
9 май — Хотира ва қадрлаш куни муносабати билан республикада ҳарбий парад ўтказиш назарда тутилмагани маълум қилинди. Мудофаа вазирлиги бошқарма бошлиғи ўринбосари Ойбек Мамадалиев олдинги йиллар ҳам бундай намойишлар бўлмаганини айтди.
Шерзод Кудбиев Ўзбекистон стол тенниси федерацияси раиси лавозимига сайланди
Давлат солиқ қўмитаси раиси Шерзод Кудбиев Ўзбекистон стол тенниси федерацияси раиси лавозимига сайланди. Аввалроқ унга қўмита ҳузуридаги Фискал институт раҳбарлиги ҳам юклатилган эди.
Тест синови топшириладиган фанлар мажмуаси тасдиқланди
2022−2023 ўқув йили учун республика ОТМ бакалавриат таълим йўналишларига мос тест синови топшириладиган фанлар мажмуаси, тест топшириқлари сони ҳамда баҳолаш мезонлари эълон қилинди. Абитуриентларга 5 та фан бўйича жами 90 та тест топшириғи берилади.
Шифокорлар 1 сентябрдан якка тартибда оилавий шифохона ташкил этиши мумкин
1 сентябрдан шифокорларга алоҳида тиббиёт муассасаси очмасдан ўз уйида ёки ижарага олган биносида якка тартибда оилавий шифокорлик фаолиятини юритишга рухсат берилмоқда. Шунингдек, оилавий поликлиникаларнинг кундузги стационар иш вақти 20:00 гача узайтирилади.
Тошкентда ОИТСга чалинган стоматолог беморларни даволаб келгани аниқланди
Тошкент шаҳрида истиқомат қилувчи 29 ёшли шахс ОИТС билан касалланганига қарамасдан тиш шифокори сифатида фаолиятини давом эттиргани аниқланди. Унга нисбатан жиноят иши қўзғатилди.
Ҳафта давомида илиқ об-ҳаво сақланиб қолади
Ҳафта давомида Ўзбекистон бўйлаб асосан қуруқ ва илиқ об-ҳаво кузатилади. Чоршанба ва пайшанба кунлари марказий ва шарқий вилоятларнинг айрим туманларида қисқа муддатли ёмғир ёғиб, момақалдироқ бўлиши ва шамол тезлиги 17−22 м/с гача кучайиши мумкин. Ҳарорат +27…+32 даражагача кўтарилади.
Самарқандда фермер 6 гектар ерни $170 мингга сотишга урингани айтилмоқда
Пастдарғом туманида фермер 6 гектар ерни ноқонуний тарзда 170 минг долларга сотишга уринганликда гумонланмоқда. У олдиндан 20 минг долларни олган вақтида ушланган. Гумондор ер майдонини фуқаро номига туман ҳокимлигидаги танишлари орқали расмийлаштиришни ваъда қилганлиги айтилмоқда.
Тошкентда кучли таъсир қилувчи дорилар сотганликда гумонланган 9 киши қўлга олинди
Ҳуқуқни муҳофаза қилувчи органлар ходимлари Тошкент шаҳри ва вилоятида кучли таъсир қилувчи дорилар савдоси билан шуғулланишда гумонланган 9 нафар шахсни ҳибсга олди. Уларнинг олдидан 34 млн сўмлик 1351 дона дори воситаси топилган.
Қардош шаҳар. Қардошлик муносабатлари нимани англатади?
Тошкент дунёдаги 26 шаҳар билан, Самарқанд эса 29 шаҳар билан қардошлик алоқаларига эга. Апрель ойининг сўнгги якшанбасида Бутунжаҳон қардош шаҳарлар куни нишонланади. Ўзбекистон шаҳарлари қанча қардошларга эга ва бу муносабатлар нимани англатади — «Газета.uz» мақоласида.
«Бу ерда ҳаммаси бошқача эканини билардим. Ва бу билан ҳисоблашиш керак». Релокантлар — Ўзбекистондаги биринчи ой ҳақида
«Газета.uz» ўз мамлакатларини тарк этиб, Ўзбекистонга кўчиб ўтишга қарор қилган Россия, Беларусь ва Украина фуқаролари ҳақида туркум материалларни тақдим этади. IT-мутахассис Даниил ва «Эхо Москвы» журналисти Ксения Тошкентдаги ҳаётларининг биринчи ойида олган таассуротлари ҳақида сўзлаб беришди.
Магистратурага ўқишга киришда мутахассислик фанларидан имтиҳонлар бекор қилиниши мумкин
Олий таълим вазири Абдуқодир Тошқулов магистратурага ўқишга кириш учун мутахассислик фанларидан имтиҳонларни бекор қилиш тартиби кўриб чиқилаётганини маълум қилди. Магистратурага ўқишга киришда чет тилини билиш даражаси тўғрисидаги малака сертификати ҳамда бакалавр дипломининг ўртача бали ҳисобга олиниши мумкин.
Сув остида қолган «Ўткан кунлар». Жиззахда содир бўлган сел оқибатлари — фото
Жиззах вилояти Фориш туманида содир бўлган сув тошқини биринчи бўлиб қабристонга урилган ва 70 дан ортиқ қабрларни оқизиб кетган. «Газета.uz» мухбири Эгизбулоқ маҳалласидаги сел оқибатлари акс этган яна бир фоторепортажни тайёрлади. Унда сув келиши оқибатида оқизиб кетилган қабрлар, аҳолининг бузилган уйлари тасвирланган.
«Овозимизни ҳам чиқармай, жимгина уруш тугашини кутишдан бошқа чорамиз йўқ» — Анна Франк кундалиги
Уруш адабиётида Иккинчи жаҳон уруши хотиралари билан боғлиқ кундаликлар орасида «Анна Франк кундалиги» энг кўп шуҳрат қозонган. Кундаликда 13 ёшли қизалоқ — Анна 1942−1944 йилларда яхудийларга қарши қирғин сабаб нацистлардан яшириниб, махфий бошпанада кечган оғир турмуши, ён-атрофида ва дунёда содир бўлаётган ҳодисаларга нисбатан ўсмирларга хос муносабати ҳақида ҳикоя қилади.
Давлат ижтимоий буюртмасига оид маълумотлар мажбурий тартибда эълон қилинади
Ҳукумат қарори билан 1 декабрга қадар дастурлар ишлаб чиқишда қатнашиш ва уларнинг ижросини мониторинг қилиш мақсадида e-ngo.uz электрон порталига жойлаштирилади. 1 январдан давлат орган ва ташкилотлари ижтимоий ҳамда иқтисодий дастурларнинг лойиҳалари, давлат ижтимоий буюртмаси натижалари, маблағларнинг сарфланиш ҳолати тўғрисидаги маълумотларни мажбурий тартибда порталга киритиб боради.
Кўчада ва метрода оғиз очаётганлар, рўзадорларга сув тарқатаётган йигитлар — Тошкент ифторлик пайтида (фото)
Рамазон ойи пайтида саҳарликни уйда қилган рўзадорлар ҳар доим ҳам ифторликка уйга қайтишга улгурмасликлари мумкин. Кимдир кўчада, кимдир йўлдалигида, яна кимдир метро ёки автобусда оғиз очмоқда. «Газета.uz» фотомухбирлари Евгений Сорочин ва Мадина Аъзам ифторлик вақтида Тошкент кўчаларини айланиб, чорраҳаларда сув ва хурмони бепул тарқатаётган ёш йигитлар билан суҳбатлашишди.
«Гуанжоу» клиникаси маҳаллий дориларни қайта қадоқлаб, қиммат нархга сотаётгани айтилмоқда
Ўзбекистонда Хитойнинг «Гуанжоу» клиникасининг Тошкент шаҳридаги ва бошқа вилоятлардаги филиалларида маҳаллий дориларни қайта қадоқлаб, қиммат нархга сотаётгани юзасидан текширув ўтказилмоқда. Клиника мансабдор шахслари ва ходимларига нисбатан жиноят иши қўзғатилди.
Энг кўп ўқилган хабарлар | Сўнгги янгиликлар
Қўшимча имкониятларга эга булиш учун сайтда рўйхатдан ўтинг