Сиёсат

5 феврал 2021, 16:30

Зайниддин Низамходжаев Марказий сайлов комиссияси раиси этиб сайланди

Марказий сайлов комиссияси йиғилишида Зайниддин Низамходжаев Марказий сайлов комиссияси раиси этиб сайланди. Унинг ўринбосари лавозимига эса Бахром Кучкаров сайланди.

5 феврал 2021, 12:45

«Самарқандда ҳоким бўлганимда, фақат Арипов келиб муаммоларни сўраган» — президент бош вазир ҳақида

Фарғона вилояти Халқ депутатлари кенгаши йиғилишида Шавкат Мирзиёев бош вазир Абдулла Арипов фаолияти ҳақида фикр билдирди. «Самарқандда ҳоким бўлганимда битта шу вазир олдимга келиб, муаммоларни сўраган. Бошқа бирорта вазир келмаган», — деди давлат раҳбари.

5 феврал 2021, 11:47

«Шуҳрат Ғаниев бош вазир бўлганимдан бери ёнимда юрибди» — президент

Президент Фарғона вилоятидаги сафари давомида бош вазир ўринбосари Шуҳрат Ғаниевнинг фаолиятига тўхталиб, «у ҳалол одам, тоза одам, ҳаловати йўқ одам. Фарғона халқини оғир синов кунларида нисбатан жуда катта иш қилди, мен ундан розиман» деди. Президент Бухорога ташрифи чоғида қишлоқ хўжалиги соҳасини уни қониқтирмаётганлигини, тизим тўғри йўлга қўйилмас, Ғаниевни ишдан бўшатишини айтган эди.

5 феврал 2021, 11:15

Абдулла Арипов Россия бош вазири Михаил Мишустин билан учрашди

4 февраль куни Олма Ота шаҳрида Ўзбекистон бош вазири Абдулла Орипов Россия бош вазири Михаил Мишустин билан учрашди. Ҳукумат раҳбарлари президент Шавкат Мирзиёевнинг март-апрель ойларида Москва шаҳрида бўлиб ўтадиган расмий ташрифига тайёргарликни муҳокама қилишди.

3 феврал 2021, 23:36

Зайниддин Низамходжаев Марказий сайлов комиссияси раиси бўлиши кутилмоқда

Марказий сайлов комиссиянинг раиси Мирза-Улуғбек Абдусаломовнинг бошқа ишга ўтиши муносабати билан унинг ўрнига Сенат раиси ўринбосари Зайниддин Низамходжаев сайланиши кутилмоқда. Унга эса адлия вазири ўринбосари Бахром Кучкаров ўринбосар бўлади.

3 феврал 2021, 21:03

2021 йилги давлат дастури қабул қилинди

Президент фармони билан 2021 йилги давлат дастури қабул қилинди. У 274 банддан иборат. Йил давомида тадбирларни амалга оширишга жами 29,5 трлн сўм, 2,6 млрд доллар ва 57,5 млн евро йўналтирилади.

3 феврал 2021, 20:57

Шухрат Атабаев президент маслаҳатчисига ўринбосар бўлди

Ипотека-банки бошқаруви раиси Шухрат Атабаев президент маслаҳатчисига ўринбосар бўлди. У Япониянинг Сиёсий фанлар миллий институтида таҳсил олган ва меҳнат фаолиятини 1995 йил Навоий вилоятидаги 14-ўрта мактабда инглиз тили ўқитувчилигидан бошлаган.

3 феврал 2021, 19:10

Марказий сайлов комиссияси раиси Мирзо-Улуғбек Абдусаломовнинг ваколати тугатилади

Депутатлар Марказий сайлов комиссиясининг 16 йиллик раиси Мирзо-Улуғбек Абдусаломов билан бирга яна 6 нафар аъзонинг ваколатини тугатишни маъқуллади. Бундан ташқари, 8 нафар янги аъзо таркиби ҳам кўриб чиқилди.

3 феврал 2021, 17:58

Ўзбекистон Демократия индексида 155-ўринни эгаллади

The Economist Intelligence Unit ташкилотининг Демократия индексида Ўзбекистоннинг позициялари ўтган йилга нисбатан яхшиланиб, мамлакат 167 давлат орасида 155-ўринни эгаллади. Лекин Ўзбекистон «авторитар режимлар» рўйхатида қолган. Минтақадаги «авторитар режимлар»да ҳолат ўтган йилга нисбатан яхшиланган бўлсада, тадқиқотчилар ушбу давлатларда сезиларли ўзгариш бўлиши кутилмаётганлигини таъкидлаган.

3 феврал 2021, 10:28

ТИВ польшалик журналистдан узр сўради

Ўзбекистон ташқи ишлар вазирлиги польшалик журналист Агнешка Пикулицкадан узр сўради. Вазирлик шилқимликда айбланган ходим ишдан бўшатилганини маълум қилди. Журналистнинг аккредитациясини расмийлаштириш 3 февраль куни якунланади, дейилади ТИВ баёнотида.

3 феврал 2021, 09:00 1

«Рақобатсиз натижа бўлмайди». Президент партия раҳбарлари билан учрашди

«Биз мамлакатнинг иқтисодий-ижтимоий ҳаёти билан боғлиқ деярли барча масалаларни президент ҳужжатлари билан тартибга солишга мажбур бўляпмиз», — дея таъкидлади президент сиёсий партия раҳбарлари билан учрашувда. Унинг сўзларига кўра, депутатлар ташаббуси билан таклиф этилган қонунлар сони «бармоқ билан санарли».

2 феврал 2021, 17:24

Жазони ижро этиш бош бошқармасига янги раҳбар тайинланди

Навоий вилояти ИИБ бошлиғи лавозимида фаолият юритиб келган полковник Турсунов Рустам Рахмонович ИИВ Жазони ижро этиш бош бошқармаси бошлиғи лавозимига тайинланди.

2 феврал 2021, 16:45

Дилшод Кенжаев президент маслаҳатчисининг ўринбосари этиб тайинланди

2018 йилдан бери Халқ таълими вазири ўринбосари лавозимида ишлаган Дилшод Кенжаев президент маслаҳатчисининг ўринбосари бўлди.

2 феврал 2021, 15:43

«Рустам кимлигини ҳеч ким билмайди». Польшалик журналист ТИВ билан учрашув ҳақида

Ўзбекистон ТИВ ходими томонидан унга шилқимлик қилинганини айтган польшалик журналист Агнешка Пикулицка вазирлик билан учрашганлигини маълум қилди. Унинг сўзларига кўра, ТИВ ҳолат бўйича текширув ўтказолмайди, чунки Рустам кимлигини ҳеч ким билмайди. Журналист уни ТИВда бир неча маротаба кўрганлигини айтмоқда. Сенат раиси Танзила Нарбаева ҳолатга муносабат билдириб, ҳодиса пухта ўрганилиб, айбдорлар жазоланишини таъкидлади. «Аммо бу республикада амалга оширилаётган ислоҳотларга соя солмаслиги лозим», — деди Нарбаева.

2 феврал 2021, 12:11

Сенат Конституция ва бошқа қонунларга ўзгартиришлар киритиш масаласини кўриб чиқади

Олий Мажлис Сенати 5 февраль куни бўлиб ўтадиган 12-ялпи мажлисда бир қатор қонунлар, шунингдек, Конституцияга ўзгартиришлар киритиш масаласини кўриб чиқади.

1 феврал 2021, 19:52

ТИВ халқаро журналистга аккредитация бермади. Журналист ТИВ ходими унга тегажоғлик қилганини айтмоқда

Guardian, Al Jazeera, The Diplomat халқаро нашрлари учун ёзадиган мустақил журналист Агнешка Пикулицка-Вилчевска Ўзбекистон Ташқи ишлар вазирлиги унга аккредитация бермаганлигини маълум қилди. Аккредитация бўйича жавоб қонун бўйича 2 ойда эмас, 6 ойда берилган. Журналист ТИВ ходими унга тегажоғлик қилганини, ижобий мақолалар ёзишини сўраганлигини айтмоқда.

1 феврал 2021, 19:13

Собиқ вазир Қарши давлат университетига ректор этиб тайинланди

Жисмоний тарбия ва спорт вазири лавозимида ишлаган Дилмурод Набиев Қарши давлат университети ректори этиб тайинланди.

1 феврал 2021, 10:50

Президент Тошкент ҳокимини «шаҳар ичидаги қурилишлар» учун танқид қилди

Инвестицион лойиҳалар тақдимотида Шавкат Мирзиёев Тошкент шаҳар ҳокими Жахонгир Ортиқхўжаевга мурожаат қилиб, шаҳар ичидаги қурилиш лойиҳалари ҳақида танқидий фикрлар билдирди. «Мен Тошкентда 4−5 йил ишлаганман оғайни. Бу ерга 120 мм ли кичкинагина канализация қўйганмиз… Сен эса у ерда 9 қаватли уй қурибсан», — деди президент.

30 январ 2021, 22:09

Азиз Абдуҳакимов Ўзбекистон шахмат федерацияси раиси этиб сайланди

Бош вазир ўринбосари — Туризмни ривожлантириш давлат қўмитаси раиси Азиз Абдуҳакимов энди Ўзбекистон шахмат федерациясига ҳам раҳбарлик қилади. Шунингдек, у бир вақтнинг ўзида «Чорвоқ» эркин туристик зонаси дирекцияси директори ва «Ипак йўли» халқаро туризм университети ректори ҳам ҳисобланади. Абдуҳакимовнинг меҳнат фаолияти ҳақида батафсил.

30 январ 2021, 13:45

Тошкент вилояти ҳокими ишдан олинди

Тошкент вилояти ҳокими Рустам Холматов президент фармони билан ишдан олинди. Унинг ўрнига Тошкент шаҳар ҳокимининг биринчи ўринбосари сифатида фаолият юритган Даврон Ҳидоятов вилоят ҳокими вазифасини бажарувчи этиб тайинланди. Олдинроқ президент битта ҳоким ва вазир ишдан олинишини эълон қилганди. «Садоқатли одам, лекин ишни бажара олмаяпти. Аравани тортмаяпти», — деганди президент ишдан кетадиган ҳоким ҳақида гапириб.


"Газета.uz"да рўйхатдан ўтиш

Қўшимча имкониятларга эга булиш учун сайтда рўйхатдан ўтинг