Сайлов-2021

9 сентябрь 2021, 11:14

Шавкат Мирзиёев президентлик даврида эришилган ютуқлар ҳақида маълумот берди

ЎзЛиДеПнинг 10-съездида партия номзоди, Шавкат Мирзиёев президентлик даврида амалга оширилган ислоҳотлар, эришилган ютуқлар ҳақида маълумот берди. Жумладан, 300 га яқин қонун, 4 мингдан зиёд президент фармони ва қарори қабул қилингани айтилди. «Ҳар қандай ислоҳот қуруқ рақамларда эмас, балки, энг аввало, аҳолининг кундалик ҳаётида, унинг дастурхони ва рўзғорида ўз аксини топиши зарур», — деди у.

9 сентябрь 2021, 11:14

2026 йилга бориб Ўзбекистон аҳолиси 38 млн дан ошиши кутилмоқда — президент

Шавкат Мирзиёев 2026 йилга бориб Ўзбекистон аҳолиси сони 38 млн дан ошиши кутилаётганини маълум қилди. Президент бундай демографик ўсиш мамлакат учун ҳам имконият, ҳам жуда катта масъулият эканлигини таъкидлади.

8 сентябрь 2021, 18:15

«Мақоламизда ёзган фактлардан ортга қайтмаймиз». «Адолат» номзоди «Миллий тикланиш» билан низо ҳақида

«Адолат» партиясидан президентликка номзод Миллий тикланиш партияси билан можароларга изоҳ берди. Баҳром Абдухалимов партия «мақоласида ёзган фактлардан орқага қайтмаслигини» айтиб, Алишер Қодировни кўчирмакашликда айблаётганини яна бир бор тасдиқлади. Қолаверса, у партия бу тўғрисидаги хабарни тарқатиш учун блогерларга пул тўлаганини инкор этди. «Дебатни Алишер Қодиров билан ҳам кутиш мумкин», — деди Баҳром Абдухалимов.

8 сентябрь 2021, 16:42

«Дебатлар қизиқ бўлади» — президентликка номзод Баҳром Абдухалимов дебатлар бўлишига ишонишини айтди

Президентлик сайловларида «Адолат» партиясидан номзод Баҳром Абдухалимов сайловолди жараёнларда дебатлар албатта ўтказилишини маълум қилди. У ўз рақиблари «етарли компетенцияга эга эканликларини» ва улар билан ўтказиладиган дебатлар «шубҳасиз қизиқ бўлишини» таъкидлади.

8 сентябрь 2021, 13:04

Баҳром Абдухалимов «Адолат» партиясидан президентликка номзод сифатида тасдиқланди

«Адолат» Баҳром Абдуҳалимовни президентлик сайловлари учун номзод сифатида тасдиқлади. Абдуҳалимовнинг «Адолат — ҳаётимизнинг бош мезони» шиори остидаги сайловолди дастуридан коррупция ва ҳар қандай кўринишдаги «самосуд» учун қатъий жазо белгилаш, Тергов қўмитасини ташкил этиш, олий таълим квоталарини бутунлай йўқ қилиш, Мактабгача таълим, Халқ таълими, Олий ва ўрта-махсус таълим вазирликларини ягона — Таълим вазирлигига айлантириш, «Жамиятда юриш-туриш, одоб-аҳлоқ қоидалари» кодексини яратиш кабилар ўрин олган.

7 сентябрь 2021, 14:18

«Адолат» партияси Алишер Қодировни кўчирмакашликда айблади. Миллий тикланиш жавоб қайтарди

«Адолат» партияси президентликка номзод Алишер Қодировни сайловолди ғояларни кўчирганликда айблади. Миллий тикланиш партияси етакчиси судларни бирлаштириш, жазони ижро этиш муассасаларини Адлия вазирлигига ўтказиш ҳамда Тергов қўмитасини тузиш ғояларини ўғирлагани иддао қилинмоқда. Миллий тикланиш эса бунга муносабат билдириб, «Адолат» партиясининг сиёсий савиясига шубҳа билан қаради.

6 сентябрь 2021, 18:53

Ўзбекистондаги сайловчиларнинг қарийб 33 фоизини ёшлар ташкил этади

Марказий сайлов комиссияси раиси Зайниддин Низамходжаевнинг маълум қилишича, сайловчиларнинг ягона электрон рўйхатида 21,2 миллиондан ортиқ сайловчи мавжуд. Уларнинг қарийб 33 фоизини (6,9 миллион) 30 ёшгача бўлган ёшлар ташкил этади.

31 август 2021, 21:08

«Бўлғуси сайловлар юксак демократик мезонлар асосида ўтади, деб ишонаман» — президент

Шавкат Мирзиёев Ўзбекистон халқини мамлакат мустақиллигининг 30 йиллиги билан қутлар экан, бўлғуси президент сайловларида дунёнинг 50 га яқин мамлакати ҳамда ўнлаб халқаро ташкилотлардан кузатувчилар иштирок этиши кутилаётганини маълум қилди. «Бўлғуси сайловлар юксак демократик мезонлар асосида ўтади, деб ишонаман», — деди у.

27 август 2021, 14:14 1

«Биз келажак учун жавобгармиз» — Экопартия номзоди Нарзулла Обломуродов сайловолди дастурини эълон қилди

Экопартия Нарзулла Обломуродовни президентлик сайловлари учун номзод сифатида тасдиқлади. Обломуродовнинг «Биз келажак учун жавобгармиз» шиори остидаги сайловолди дастуридан яшил иқтисодиётни ривожлантириш, чиқиндиларни ресурсга айлантириш, аҳолини ичимлик суви билан таъминлаш, Орол минтақасида вазиятни яхшилаш, суд органларига ишончни ошириш, соғлиқни сақлаш ҳамда Ўзбекистон атрофида хавфсизлик минтақасини яратиш йўналишлари ўрин олган. Партиянинг тўлиқ дастури.

25 август 2021, 15:59

Афғонистонда сайлов участкаларини очиш кўзда тутилган — ТИВ

Ташқи ишлар вазирининг биринчи ўринбосари Фарҳод Арзиевнинг маълум қилишича, Ўзбекистон ўзининг Афғонистондаги дипломатик ваколатхоналарида президент сайлови даврида сайлов участкаларини очишни режалаштирилмоқда.

25 август 2021, 14:23

Пандемия даврида президент сайлови: МСК махсус йўриқномани қабул қилди

МСК пандемия даврида президент сайловини ўтказишга оид махсус йўриқномани қабул қилди. Унга кўра, тана ҳарорати юқори бўлган фуқаролар сайлов участкасига киритилмайди, улар учун очиқ ҳавода кўчма сайлов қутилари ташкил қилинади. Қолаверса, яширин овоз бериш кабиналарига парда осилмайди. Сайлов бошланишидан 6 соат олдин овоз бериш бино ва хоналари дезинфекция қилинади.

23 август 2021, 10:41

Алишер Қодировнинг президентликка номзодини қўллаб-қувватлаш учун имзолар мажбурий йиғилаётгани айтилмоқда

Ижтимоий тармоқларда мактаб тарғибочилари уйма-уй юриб, «Миллий тикланиш» партиясининг президентликка номзоди Алишер Қодировни қўллаб-қувватлаш учун мажбурий равишда имзолар йиғаётгани айтилмоқда. Ҳолатга Алишер Қодиров муносабат билдириб, имзо йиғишда мажбурлаш бўлмаслиги кераклигини таъкидлади ва партия фаолларининг босимига учраганлардан депутатнинг Telegram-ботига хабар беришни сўради.

19 август 2021, 10:08

Сиёсий партияларга сайловчилар билан оммавий тадбирларни ўтказишга рухсат берилди

Коронавирусга қарши кураш бўйича махсус комиссия партияларга карантин талабларига асосан сайловолди йиғилишлари ва бошқа оммавий тадбирларни ўтказишга рухсат берди. Уларга эмланганларни таклиф қилиш тавсия этилди.

14 август 2021, 13:30

МСК 5 та партияга сайловда иштирок этишга рухсат берди

Шанба куни Марказий сайлов комиссияси бешта сиёсий партия — Экологик партия, ХДП, ЎзЛиДеП, «Миллий тикланиш» ва «Адолат» партияларига октябрдаги президент сайловида қатнашишга ижозат берди. Улар 9 сентябрга қадар ўз номзодини рўйхатдан ўтказиши мумкин.

11 август 2021, 16:53

Хориждаги ўзбекистонликлар учун 49 та давлатда стационар ва кўчма сайлов пунктлари ташкил этилади

Чет элда истиқомат қилаётган ўзбекистонликларнинг президент сайловида қатнашиши учун 49 та давлатда 54 та стационар ва 316 та кўчма сайлов пункти ташкил этилади. Жумладан, Ўзбекистоннинг Нью-Йоркдаги бош консулхонаси ва БМТдаги ваколатхонасида ягона сайлов участкаси бўлади. Ҳозиргача хориждаги сайловчиларнинг бирламчи рўйхати ҳам шакллантирилди.

9 август 2021, 11:39

Мислсиз ислоҳотлар ўз-ўзидан бўлмайди — Абдулла Арипов

«Биз жуда тез амалга оширилаётган ўзгаришларга кўникиб қолдик. Уларнинг моҳиятини англашга улгурмаяпмиз. Мислсиз ислоҳотлар айнан шундай бўлиши керакдек ва шу ишлар ўз-ўзидан бўлаётгандек қабул қиляпмиз» — деди Абдулла Арипов ЎзЛиДеП сиёсий кенгашининг навбатдаги мажлисида. Барча ислоҳотлар замирида Шавкат Мирзиёевнинг қатъияти мужассам, дея таъкидлади у.

9 август 2021, 10:16

«Бизнинг мақсадимиз битта — президентлик сайловларида ғолиб бўлиш» — ХДП раиси

Халқ демократик партияси раиси Улуғбек Иноятов партиянинг мақсади ҳукуматни эгаллаш, яъни президентлик сайловларида ғолиб бўлиш эканлигини билдирди. Унинг таъкидлашича, сайловларда халқ аёлларга кўпроқ овоз беради. «Ана шу нуқтайи назардан биз номзодимизни тўғри танладик, деб ўйлайман. Бу бизнинг сайловларда ғалаба қозонишимизда бир қадам бўлди, деб ҳисоблайман», — дейди у.

7 август 2021, 17:42

Шавкат Мирзиёевнинг сайловолди тарғиботи ва амалдаги вазифаси аралашиб кетмаслиги назорат қилинади — МСК

Марказий сайлов комиссияси томонидан ОАВ ва блогерлар билан ўтказилган очиқ мулоқотда амалдаги президентнинг вазифаси ва сайловолди тарғиботи аралашиб кетмаслиги назорат қилиниши айтилди. «Албатта, номзодни сайловолди тарғиботи ва ўзининг фаолиятини адаштирмаслигимиз керак. Лекин назорат қилинади», — деди МСК раиси ўринбосари Баҳром Қўчқоров. Комиссия аъзоси Шерзодхон Қудратхўжа эса Шавкат Мирзиёевнинг ташриф ва учрашувлари тагида пиар эмас, балки ислоҳотлар ётганини таъкидлади.

7 август 2021, 14:28 1

«Мен фақат аёл эканлигим учун номзод бўлмадим» — Мақсуда Варисова

Президент сайловларида ХДП номзоди сифатида қатнашиши кутилаётган Мақсуда Варисова сайловда ғалаба қозонса, аввало ишсизлик ва бандлик соҳасида ислоҳотлар қилишини таъкидлади. Унинг таъкидлашича, президентликка номзодлар орасида аёл кишининг бўлишига гендер тенглик тамойили сабаб эмас. «Халқ орасидан чиққан оддий бир она, оддий бир аёл бўлганим сабабли ҳам, халқимизни қийнаб турган муаммоларни қуйидан билганим учун ҳам мени танлашди, деб ўйлайман», — деди у.

7 август 2021, 11:18

Шавкат Мирзиёев президентлик сайловларида ЎзЛиДеП партиясидан қатнашади

ЎзЛиДеП партияси октябрь ойидаги президентлик сайловига амалдаги давлат раҳбари Шавкат Мирзиёев номзодини кўрсатмоқчи эканлигини эълон қилди.


"Газета.uz"да рўйхатдан ўтиш

Қўшимча имкониятларга эга булиш учун сайтда рўйхатдан ўтинг