1 февраль куни Ўзбекистон Фанлар академияси ҳақиқий аъзоси, физика-математика фанлари доктори, профессор Галина Павловна Матвиевская Оренбург шаҳридаги уйида 95 ёшида вафот этди, дея хабар берди академия матбуот хизмати.
Галина Матвиевская 1930 йилда Днепропетровск (ҳозирги Украинанинг Днепр шаҳри)да туғилган. У 1959 йилда Ўзбекистон Фанлар академиясининг Математика институтига ўрта асрлар Шарқидаги фанлар тарихи бўйича тадқиқотларни кучайтириш учун таклиф қилинган.
У Борис Абрамович Розенфелд билан биргаликда жаҳон фондларида сақланаётган араб тилидаги математика ва астрономияга оид қўлёзмалар каталогини тузган, шогирдлари билан биргаликда ФА Абу Райҳон Беруний номидаги Шарқшунослик институтидаги математик қўлёзмаларининг тавсифини амалга оширган.
Ўзбекистонда шарқшунослик фанининг ривожига ҳисса қўшган атоқли олима Муҳаммад ибн Мусо ал-Хоразмий, Абу Райҳон Беруний, Шамсиддин Самарқандий ва Мирзо Улуғбек, Қозизода Румий, Жамшид Коший ва бошқа олимларининг илмий меросини ўрганиш ва тарғиб қилиш, шунингдек, илм-фан тарихи бўйича мутахассислар тайёрлашдаги хизматлари учун Беруний номидаги Ўзбекистон давлат мукофоти (1974), «Ўзбекистон Республикасида хизмат кўрсатган фан арбоби» фахрий унвони (1980) билан тақдирланган.
Профессор Фанлар академияси мухбир аъзоси (1984), сўнгра академиянинг ҳақиқий аъзоси (2000) этиб сайланган. У ЮНEСКО томонидан табиий фанлар тарихи бўйича йирик мутахассис сифатида тан олинган ва Халқаро фанлар тарихи академиясининг (Париж) ҳақиқий аъзоси этиб сайланган.
Галина Матвиевская Хоразмий, Декарт, Беруний, Улуғбек, Романовский, Сўфий ҳақида китоблар нашр эттирган, шарқшунослик соҳасига илмий тўпламлар тузувчиси ва бош муҳаррири бўлган, Муҳаммад ибн Мусо ал-Хоразмийнинг 1200 йиллиги муносабати билан ташкил этилган юбилей (1983) тадбирларини ўтказишда фаол иштирок этган, дейилади хабарда.