Нью Йорк штати судьяси Хуан Мерчан 10 январь куни АҚШнинг сайланган президенти Дональд Трампга нисбатан ҳукм чиқаради, гап порноактриса Сторми Дэниелсга сукут сақлаши учун пул тўлаш билан боғлиқ иш ҳужжатларини сохталаштириш ҳақида кетмоқда, деб хабар берди Reuters.

Шундай қилиб, Трампга нисбатан ҳукм 20 январь куни бўлиб ўтадиган инаугурациясидан 10 кун олдин чиқарилади. Трампга қадар ҳеч бир АҚШ президенти — собиқ ёки амалдаги президент — жиноят ишида айбланган ёки ҳукм қилинмаган, дея қайд этади агентлик.

Қарорда судья Трампни ҳақиқий қамоқ жазосига ҳукм қилиш нияти йўқлигини, шунингдек, унга жарима ёки синов муддати тайинламаслигини айтиб огоҳлантирди. Бундан ташқари, Трампга ҳукм эълон қилинишида шахсан бориб ёки видеоалоқа орқали иштирок этишга рухсат берилди.

Трампнинг вакили Стивен Чунг ишни ноқонуний деб атади ва Конституцияга кўра, у тўхтатилиши кераклигини айтди.

Трамп 2016 йилги президентлик сайловлари арафасида порноактрисага пул тўлаганини яширишга уринганликда айбланмоқда. Тергов маълумотларига кўра, Трамп адвокат орқали актрисага у билан алоқаси ҳақида сукут сақлаши учун 130 минг доллар тўлаган. Ўз-ўзидан бу тўлов қоидабузарлик эмас эди, аммо Трамп ва унинг адвокати Майкл Коэн уни суд харажатлари учун тўлов сифатида расмийлаштирган, бу Нью Йорк штатида ҳисоботларни сохталаштириш дея ҳисобланади ва жиноий тартибда жазоланади. Трамп ўз айбига иқрор бўлмаган.

2024 йил май ойида суд маслаҳатчилари Трампни айбловнинг барча 34 банди бўйича айбдор деб топган. Ҳукм чиқариш 2024 йил 11 июлга белгиланганди, бироқ бу бир неча марта қолдирилди.

Трамп АҚШ Олий судининг собиқ президентлар расмий хатти-ҳаракатлари учун жиноий таъқибдан иммунитетга эга экани ҳақидаги 1 июлдаги қарорига асосланиб, бу иш бўйича айблов ҳукмини бекор қилиш ҳақида алоҳида илтимоснома киритган эди, аммо ютқазди.

Ноябрь ойида, Трамп сайланганидан сўнг, унга қарши иккита федерал иш — 2020 йилги сайловларга аралашиш ва махфий ҳужжатлар билан тегишлича муомала қилмаслик бўйича ишлар тўхтатилди. Бунга АҚШ Адлия вазирлигининг президентни судда таъқиб қилишни тақиқловчи сиёсати сабаб бўлди.

Жоржия штатида Трампга қарши 2020 йилги сайлов натижаларини бекор қилишга уриниш бўйича жиноий иш прокурор Фани Уиллис лавозимидан четлаштирилгани сабабли бир неча ойдан бери муаллақ турибди.