Россия Тергов қўмитаси Москвада содир бўлган террор ҳужумида гумон қилинаётган шахснинг қўлга олинганини маълум қилди. Ушбу ҳужум оқибатида 17 декабрь куни Россия Қуролли кучлари радиациявий, кимёвий ва биологик мудофаа қўшинлари қўмондони Игорь Кириллов ҳамда унинг ёрдамчиси Илья Поликарпов ҳалок бўлган.
Қўмита маълумотларига кўра, қўлга олинган шахс 1995 йилда туғилган Ўзбекистон фуқаросидир. Унинг исми маълум қилинмаган. Сўроқ пайтида гумонланувчи уни Украина махсус хизматлари ёллаганини айтди, деб таъкидланади полиция матбуот хабарида. Жиноят содир этгани учун унга 100 минг доллар мукофот ва Европа давлатларидан бирига жўнаб кетиш ваъда қилинган.
Гумонланувчи Москвага келиб, қўлбола портловчи қурилмани олган, сўнгра Игорь Кириллов яшайдиган Рязань проспектидаги уй яқинидаги электросамокатга портловчи моддани жойлаштирган.
«Ҳарбий хизматчининг яшаш жойини кузатиш мақсадида у каршейринг автомобилини ижарага олган ва у ерда видеокузатув камерасини ўрнатган. Ушбу камерадан олинган тасвир Днепрдаги теракт ташкилотчиларига онлайн трансляция қилинган. Ҳарбий хизматчиларнинг подъезддан чиқиши ҳақида видеоалоқа олинганидан сўнг улар томонидан портлатиш қурилмаси масофадан туриб ишга туширилган», — дейилади Тергов қўмитаси хабарида.
Россия Федерал хавфсизлик хизмати давлат агентликлари орқали ҳибсга олинган шахсни сўроқ қилиш видеосини тарқатди. «Мен Украина махсус хизматларининг топшириғи билан Москвага келдим. Кейин самокат сотиб олдим. Бир неча ойдан кейин бомба учун буюмлар келди, уларни олдим. Кейин ҳамма нарсани тайёрлаб, генерал яшайдиган уй ёнига қўйишди. Кейин у уйдан чиққач, тугмачани босдим. Нега бундай қилдим, нима учун? Менга 100 минг доллар ва Европа паспорти таклиф қилишди», — дейди видеодаги эркак.
Shot ва Baza маълумотларига кўра, генерални ўлдиришда гумон қилинаётган шахснинг исми — Аҳмад Қурбонов. Telegram каналларининг хабар беришича, у Балашихда яшаган ва Москва яқинидаги Черное қишлоғида қўлга олинган.
Генерал Кириллов ва унинг ёрдамчиси ўлдирилгани ҳолати бўйича қўмита томонидан Теракт, қотиллик ва қуролларнинг ноқонуний айланишига оид моддалар бўйича жиноий иш қўзғатилди. Терговчилар портлашни Украина махсус хизматлари — Мудофаа вазирлиги разведка бош бошқармаси ёки Украина Хавфсизлик хизмати уюштирганликда гумон қилмоқда. Бир қатор оммавий ахборот воситалари манбаларининг тасдиқлашича, Кирилловнинг ўлдирилиши хавфсизлик хизматининг махсус операцияси бўлган, чунки россиялик генерал «ҳарбий жиноятчи ва мутлақо қонуний нишон бўлган, чунки у Украина ҳарбийларига қарши тақиқланган кимёвий қуролдан фойдаланишга буйруқ берган».
Reuters агентлиги ва New York Times газетаси Украина махсус хизматларидаги манбаларига таяниб, Кирилловни ўлдириш операциясини Украина Хавфсизлик хизмати (УХХ) амалга оширганини хабар қилганди. Унинг ўлимидан бир кун олдин УХХ Кирилловга нисбатан сиртдан айблов эълон қилиб, генерални Украина армиясига қарши кимёвий қуролларни оммавий қўлланилишида айблаган.