Президент Шавкат Мирзиёев 16 декабрь куни бўлиб ўтган йиғилишда мамлакатда кичик бизнесни қўллаб-қувватлашнинг янги имкониятларини белгилаб берди.

Таъкидланишича, ўтган олти йилда оилавий тадбиркорлик дастури доирасида 750 минг аҳоли кредитини вақтида тўлаб, даромадли бизнесга эга бўлган. Шундан 58 минг нафари янги корхона ҳам очган.

Президент қарорига (ПҚ-312) мувофиқ, камида бир йил мобайнида фаолият юритаётган ва ижобий кредит тарихига эга бўлган кичик тадбиркорлик субъектларига 100 миллион сўмгача бўлган гаровсиз микрокредитлар ажратилади. Бироқ оилавий тадбиркорлик дастурлари бўйича кредит олиб, ўз вақтида қайтарган фуқаролар ушбу қарор асосида кредит ололмайди. Сабаби уларга шахс сифатида қаралади.

Энди банклар мана шундай синовдан ўтган мижозларини қўллаб-қувватлаб, уларни кичик ва ўрта бизнес даражасига олиб чиқиши керак, таъкидлади президент. Уларга «Кичик бизнесни қўллаб-қувватлаш дастури» доирасида 300 миллион сўм миқдорида шартсиз кредит ажратилади.

Бу орқали келгуси йилларда 1,5 миллион аҳолини иш билан таъминлаш кутилмоқда.

Бугунги кунда оилавий тадбиркорлик дастурлари учун кредит ресурслари фақат давлат маблағлари ҳисобидан ажратилмоқда.

Халқ банки ташаббуси билан Осиё тараққиёт банкининг (ОТБ) молиявий оммабоплик дастури доирасида 50 миллион сўмгача кредитлар ортиқча ҳужжат ва гаровсиз берилмоқда. ОТБ дастур учун 150 миллион доллар ажратишга тайёр.

Ушбу намуна асосида 2025 йилда 9 та давлат банкига четдан 1 миллиард доллар кредит жалб этиш, 250 минг аҳолини даромадли қилиш тавсия қилинди.

2023 йил сентябрь ойидан бошлаб Ўзбекистонда кичик бизнесни доимий қўллаб-қувватлаш бўйича комплекс дастур ишга туширилганди. Унга янги «Бизнесни ривожлантириш банки» масъул ҳисобланади. Ташаббусни 2026 йилгача амалга ошириш учун халқаро институтлардан 6 триллион сўм ва 1,2 миллиард доллар ажратиш режалаштирилган эди.