АҚШнинг сайланган президенти Дональд Трамп Time журнали томонидан 2024 йил учун йил одами деб топилди.

time журнали, йил одами

12 декабрь куни Time журналида чоп этилган мақолада Трампни «дунёдаги энг қудратли одам» деб аташди.

Трампнинг сиёсий тикланиши Америка тарихида ўхшаши йўқ воқелик. Унинг биринчи муддати шармандалик билан якунланди: 2020 йилги сайлов натижаларини бекор қилишга уринишлар АҚШ Капитолийсига ҳужум билан якунланди… Июль ойида Пенсилвания штатининг Батлер шаҳридаги митингда қотилнинг отган ўқи унинг бошидан бир дюймдан камроқ масофада кесиб ўтди. Кейинги тўрт ой ичида у бир эмас, иккита мухолиф демократни ортда қолдирди, «тебранаётган» еттита штатнинг барчасида ғалаба қозонди. У Америка сиёсатини ўзгартириб, Республикачилар партиясини қайта тузди ва демократларни нима нотўғри бўлгани ҳақида ўйлашга мажбур қилди, дейилади журнал эълон қилган мақолада.

Time маълумотларига кўра, 2024 йил учун номзодлар рўйхатига, хусусан, АҚШ вице-президенти Камала Ҳаррис, тадбиркор Илон Маск, Исроил бош вазири Биньямин Нетаньяҳу, Алексей Навальнийнинг аёли Юлия Навальная кирганди.

Time журнали 1927 йилдан бери сўнгги 12 ой ичида дунёга энг катта таъсир кўрсатган одамни номлаб келади, бу таъсирнинг қандайлиги аҳамиятсиз. Time аллақачон Трампни 2016 йилда, у биринчи марта АҚШ президенти бўлганида йил одами деб атаган эди.