Европа Иттифоқи мамлакатлари ички ишлар вазирлари 12 декабрь куни бўлиб ўтган йиғилишда 2025 йил 1 январдан бошлаб Руминия ва Болгария билан ички чегараларда чегара назоратини бекор қилди, дея хабар берди Европа комиссияси.

«Ушбу муҳим қадам ҳар икки мамлакатнинг Шенген зонасига тўлиқ киришини якунлайди», — дейилади Еврокомиссия сайтида.

«Болгария ва Руминияни ниҳоят Шенген маконининг тўлақонли аъзолари сифатида кутиб олиш тарихий лаҳзадир. Ушбу аъзо давлатлар билан ва улар ўртасидаги ички қуруқлик чегараларида шахсларни текширишни бекор қилиш Венгрия раислигининг асосий устувор йўналиши эди ва бугун биз буни ҳақиқатга айлантирдик. Ушбу қадам нафақат Болгария ва Руминия фуқароларига, балки бутун Европа Иттифоқига ҳам фойда келтиради», — деди Европа Иттифоқи кенгашида раислик қилаётган Венгриянинг ички ишлар вазири Шандор Пинтер.

Руминия ва Болгария Европа Иттифоқига қўшилганидан ўн етти йил ўтгач, уларга Шенген бўйлаб чегарасиз саёҳат учун яшил чироқ кўрсатилди. Бу Руминия ва Болгарияда яшовчи ва ниҳоят Европа Иттифоқининг тўлиқ аъзоси сифатида қабул қилинган 25 миллион киши учун катта енгиллик лаҳзаси, деб ёзади BBC. Европа комиссияси президенти Урсула фон дер Ляйен бу кун «шодлик куни» эканини таъкидлади.

Европа Иттифоқи Кенгаши 2023 йил 31 декабрдаги қарори билан Болгария ва Руминияни Шенген ҳудудига қабул қилди. Шенген келишуви қоидалари ҳар икки давлатда 2024 йил 31 мартдан кучга кирган, шу билан бирга, ички ҳаво ва денгиз чегараларида назорат бекор қилинди.

Аммо юк машиналари ҳайдовчилари учун чегара бюрократияси ҳали ниҳоясига етмади, деб таъкидлайди BBC.

Руминия ва Болгариянинг Шенген ҳудудига тўлиқ киришини Австрия 2022 йилда ноқонуний миграциянинг кўпайишидан қўрқиб, тўсиб қўйганди. 9 декабрда мамлакат Ички ишлар вазирлиги мамлакатлар чегараларни ҳимоя қилиш бўйича чораларни келишиб олгандан сўнг Шенген зонасини кенгайтиришга қўйган ветосини бекор қилди.

Ҳозирда Шенген зонаси 29 мамлакат (Австрия, Бельгия, Болгария, Хорватия, Чехия, Дания, Эстония, Финляндия, Франция, Германия, Греция, Венгрия, Исландия, Италия, Латвия, Лихтенштейн, Литва, Люксембург, Мальта, Нидерландия, Норвегия, Польша, Португалия, Руминия, Словакия, Словения, Испания, Швеция ва Швейцария) ва 420 миллион аҳолини қамраб олади. Кипр билан ички чегаралар назорати ҳали бекор қилинмаган, Ирландия эса Шенген зонасига кирмайди, деб эслатди Европа Иттифоқи Кенгаши ўз баёнотида.