Корея Республикаси парламенти 3 декабрь куни мамлакат президенти Юн Сок Ёль томонидан жорий этилган ҳарбий ҳолатни бекор қилиш учун овоз берди, деб хабар бермоқда Yonhap ва Reuters.

Овоз беришда 300 нафар депутатдан 190 нафари иштирок этди. Улар Миллий Ассамблея биносида тўсиқлар ўрнатиб, махсус кучларни ичкарига киритмади.

жанубий корея

Мамлакат Конституциясига кўра, ҳарбий ҳолат парламентдаги кўпчилик талаб қилганида бекор қилиниши керак, дея аниқлик киритди Yonhap.

жанубий корея

Маҳаллий телеканалларнинг жонли эфирида Миллий мажлис (парламент) биноси олдида одамлар тўплана бошлаганини кўриш мумкин.

Намойишчилар «Президент Юнга импичмент,» «Ҳарбий ҳолатни бекор қилинг, демократияни ҳимояланг» ва «Биз ғалаба қиламиз» деб бақирмоқда.

«Жуда жаҳлим чиққан, шунинг учун бу ерга келдим. Буни тушуниш қийин. Бу 50 йил олдин содир бўлиши мумкин эди, лекин ҳозир эмас, ҳеч ким тушунмаяпти», — деди намойиш иштирокчиларидан бири Reuters нашрига.

жанубий корея

Парламент қароридан сўнг ҳарбий ҳолат қўшинлари Миллий Ассамблея биносини тарк эта бошлади. Таълим вазирлиги барча таълим муассасаларида ўқиш ўзгаришсиз давом этишини маълум қилди.

Воқеалар ривожи

  • Президент телекўрсатувда ҳарбий ҳолат жорий этилганини эълон қилди ва буни конституциявий тартибни «коммунистик кучлар»дан ҳимоя қилиш зарурлиги билан изоҳлади. У бундай чорани мухолифатнинг ҳаракатлари туфайли қўллаганини айтди, унинг сўзларига кўра, мухолифат мамлакатни инқирозга олиб кирмоқчи.
  • У бу қарорни парламентда кўпчиликка эга бўлган мухолифатдаги Демократик партия ҳукуматнинг бюджет бўйича таклифини рад этиб, давлат аудитори ва бош прокурорига импичмент эълон қилишга қарор қилганидан кейин қабул қилди.
  • Демократик партия етакчиси Ли Же Мён ҳарбий ҳолат жорий этилишини Конституцияга зид деб атади. Президентнинг «Халқ кучи» партияси раҳбари Хон Дон Хун ҳам қарорни қўллаб-қувватламади, уни «нотўғри» деб атади ва блоклашни ваъда қилди. Ли Же Мён ҳам тарафдорларини Миллий Ассамблея биносига келишга чақирди.