Ўзбекистонда хорижга чиқиш учун тайёр паспортни почта хизмати орқали олиш имконияти пайдо бўлади. Президент Шавкат Мирзиёевнинг 4 ноябрдаги қарори билан фуқароларнинг хорижга чиқиш тартибига бу борадаги қўшимчалар киритилди.

Ўзгартиришларга кўра, хорижга чиқиш паспортини почта орқали етказиш ҳақида сўров мавжуд бўлганда, маълумотларни йиғиш пункти ходими ҳужжатни почта хизмати ходимига топширади.

Тайёр паспортни олгач, почта хизмати ходими ариза берувчи билан телефон орқали боғланиб, паспортни сўровномада кўрсатилган манзилга етказиб бериши шарт. Тошкент шаҳри ва вилоят марказларида етказиб бериш муддати бир иш куни, бошқа шаҳар ва туманларда эса икки иш кунини ташкил этади.

Агар ариза берувчи келишилган вақтда кўрсатилган манзилда бўлмаса, паспортни 10 иш куни ичида маҳаллий почта бўлимидан олиши мумкин.

Агар фуқаро ҳужжатни белгиланган муддатда олмаган бўлса, почта хизмати ходими уни маълумотларни йиғиш пунктига қайтариши лозим. Ариза берувчи шахсини тасдиқловчи ҳужжатни кўрсатиб, паспортни олиши мумкин.

Почта харажатлари ариза берувчи томонидан тўланади. Нархни почта хизмати белгилайди. Почта хизматлари учун тўланган сумма қайтарилмайди.

Ҳужжатга кўра, почта хизмати ходими паспортни олган пайтдан бошлаб, уни ариза берувчига топширгунга ёки маълумотларни йиғиш пунктига қайтаргунга қадар унинг хавфсизлиги учун жавобгар ҳисобланади.

Тайёр хорижга чиқиш паспорти фақат ариза берувчининг ўзига берилиши мумкин. 16 ёшдан ошган шахслар учун олиш тартиби бармоқ изларини солиштириш ёки биометрик идентификация (Face-ID) орқали тасдиқлашни ўз ичига олади. Кейинги усул тартибга қўшимча равишда киритилган бўлиб, илгари фақат бармоқ изларини солиштириш назарда тутилганди.

16 ёшгача бўлганлар учун хорижга чиқиш паспортини олиш сўровномасига қўшимча банд киритилди. Унда ота-она, уларнинг ўрнини босувчи шахслар ёки кузатувчи шахслар болани чет давлат ҳудудида назоратсиз қолдирганлик, шунингдек, уни таъминлаш, таълим ва тарбия бериш, ота-онасига ёки яқин қариндошларига ёхуд Ўзбекистон ҳудудида тақиқланмаган ва тегишли чет давлатнинг зарур ваколатларига эга бўлган ташкилотга топшириш мажбуриятларини бузганлик учун маъмурий ёки жиноий жавобгарликка тортилиши тўғрисида огоҳлантириш назарда тутилган.

Эслатиб ўтамиз, ўтган йилнинг июль ойида ҳукумат миграция ва фуқароликни расмийлаштириш соҳасида давлат хизматларини кўрсатишнинг такомиллаштирилган тартибини тасдиқлаганди. Ҳужжатда 2023 йил 1 октябрдан бошлаб ID-карта ва хорижга чиқиш паспортларини уларнинг эгаларига почта хизмати орқали етказиб бериш жараёнини йўлга қўйиш назарда тутилган. 2023 йил 1 декабрдан бошлаб эса фуқароларнинг яшаш жойларига бориб, миграция соҳасида хизматлар кўрсатишни бошлаш режалаштирилганди.

2023 йил январидан бошлаб ҳайдовчилик гувоҳномасини почта орқали олиш мумкин. Бунинг учун Ягона давлат хизматлари порталида рўйхатдан ўтиш, давлат божини тўлаш ва гувоҳнома икки кун ичида етказиб бериладиган манзилни кўрсатиш керак.