Ўзбекистон президенти 14 октабрдаги фармони билан ташқи савдо операциялари бўйича валюта назорати сиёсатига киритиладиган ўзгартиришларни тасдиқлади.
Фармон билан божхона тўловларини кечиктириб тўлаш муддатлари бирхиллаштирилиши ва уларнинг 120 кундан ошмаслиги белгиланди.
Ҳужжат билан тадбиркорларга божхона тўловларини фоизсиз ва гаровсиз бўлиб тўлашига рухсат бериладиган муддат қисқартирилмоқда. Илгари муддат бир йилгачани ташкил этарди, эндиликда муддат 120 кунгача қисқарди. Гап «20 минг тадбиркор — 500 минг малакали мутахассис» дастурига киритилган компаниялар ҳақида бормоқда.
Қишлоқ хўжалиги техникасини ишлаб чиқариш ва уларга хизмат кўрсатиш учун бутловчи қисмлар, хомашё ва материаллар импорти учун қўшилган қиймат солиғини кечиктириб тўлаш муддати 270 кундан 120 кунга қисқартирилди.
Ишлаб чиқарилган муддати 5 йилдан ошмаган, экиш, ем-хашак экинларини йиғиш ва тайёрлашда ишлатиладиган қишлоқ хўжалиги техникалари, уларнинг бутловчи қисмлари ва хориждан олиб келинган эҳтиёт қисмларини импорт қилишда ҳам ҚҚСни кечиктириб тўлаш муддати қисқартирилмоқда.
Бундан ташқари, етказиб бериш муддати 180 кундан ортиқ бўлган асбоб-ускуналарни олиб кириш бўйича шартномалар юзасидан муддати ўтган дебиторлик қарзлари бўйича молиявий санкциялар қўлланилмаслигини назарда тутувчи тартиб бекор қилинди. Ушбу қоида 2019 йил июнь ойида жорий этилганди.
Шунингдек, чорвачилик корхоналари хориждан олиб келадиган чорва моллари, туялар, балиқ чавоқлари, ем-хашак ва бошқа материалларни (жами 203 та позиция) импорт қилишида ҚҚСни тўлаш муддати қисқартирилди.
Ўзгартиришлар сайёҳларни ташиш учун импорт қилинадиган автобуслар учун ҚҚСни бўлиб тўлаш муддатига ҳам алоқадор, бу муддат 12 ойдан 120 кунгача қисқартирилади.
Қишлоқ хўжалиги корхоналари ва тадбиркорлар учун ҳайдов тракторлари ҳамда пахта териш машиналарини олиб киришда қўшилган қиймат солиғини кечиктириб тўлаш муддати 270 кундан 120 кунга қисқартирилмоқда.
«20 минг тадбиркор — 500 минг мутахассис» дастурида иштирок этаётган корхоналар ташкил этилган иш ўринлари сонига қараб кечиктирилган муддатлардан фойдаланиши мумкин бўлади. Муддат 51−100 киши иш ўрни яратганда 60 кун, 101−200 та иш ўрни яратганда эса 90 кун бўлади.
«Ўзбекипаксаноат» уюшмаси таркибидаги корхоналар томонидан ўзлари ишлаб чиқарган ипак маҳсулотларини экспорт қилиш операциялари бўйича муддати ўтказиб юборилган дебитор қарздорлик ҳосил бўлишини ҳисоблашнинг ягона муддати бекор қилинмоқда. Шу вақтгача у божхона юк декларацияси расмийлаштирилган санадан бошлаб 360 кунни ташкил этарди.
Фармон билан муддати ўтган дебиторлик қарзлари мавжуд бўлганда товарларни кафолатли тўловсиз олиб чиқишга рухсат берувчи қоида бекор қилинмоқда. Мазкур қоида 2020 йил март ойида коронавирус пандемияси фонида жорий қилинганди.
Ўзгаришларнинг аксарияти уч ой ўтиб кучга киради.